نوح،میوات،ہریانہ اردو اکیڈمی پنچکولہ میں طویل عرصہ تک بطور پروگرام انچارج خدمت انجام دینے والے مشہور شاہر ، ادیب و نقاد ڈاکٹر محمد ایوب خان کی تین تصانیف کی پنجاب اردو اکیڈمی کی جانب سے رسم اجراءکی تقریب مالیرکوٹلہ میں منعقد ہوئی۔ سردار گورلولین سنگھ سدھو آئی اے ایس (ریٹائرڈ) کی صدارت میں منعقد اس شاندار تقریب میں ڈاکٹر جمیل الرحمن ایم ایل اے مالیرکوٹلہ نے بطور مہمان خصوصی جبکہ پروفیسر سیوک نیئر آئی اے ایس(ریٹائرڈ)، پروفیسر ڈی ڈی بھٹی، پروفیسر ڈاکٹر عزیز پریہار، ڈاکٹر محمد اقبال نے بھی بطور مہمان اعزازی شرکت کی۔ پنجاب اردو اکادمی کی طرف سے شائع ہونے والے ڈاکٹر محمد ایوب خان کے تین شعری مجموعے سفر در سفر، ریگ رواں اور رخت سفر کی رسم رونمائی پر موجود شخصیات نے انہیں مبارکباد پیش کی۔ ڈاکٹر محمد ایوب خان اردو، پنجابی اور ہندی کے معروف شاعر، ادیب اور نقاد ہیں۔ ان کی دو تحقیقی کتابیں’پنجاب میں فارسی غزل بحوالہ ناصر علی سرہندی‘ اور’تقسیم ہند کے بعدپنجاب میں اردو افسانہ نگاری (1901 تا 1991)‘اردو زبان میں نیشنل کونسل فار پرموشن اردو لینگویج نئی دہلی کے اشتراک سے شائع ہوئیں۔ ان کے پنجاب اردو اکیڈمی، مالیرکوٹلہ کے تعاون سے غزلوں کے تین مجموعے’سفر در سفر‘،’ریگ رواں‘ اور’رخت سفر‘شائع ہوئے۔ آپ کا اردو دیوان بھی عنقریب شائع ہونے والا ہے جو اردو شاعری کی دنیا میں اپنی انفرادیت کی وجہ سے پہچانا جائے گا۔
علاوہ ازیں اردو، فارسی، پنجابی اور انگریزی زبانوں میں ادب سے متعلق 100 کے قریب تحقیقی مقالے و ڈیڑھ درجن سے زائد کتابیں شائع ہو چکی ہیں۔ جن میں سے ’آگ کا دریا:تفہیم و تجڑیہ‘ایم اے اردو کی کلاسوں کے نصاب میں پنجابی یونیورسٹی پٹیالہ سے منظور شدہ کتابوں کی فہرست میں شامل ہے۔ ڈاکٹر محمد ایوب خان نے ہریانہ اردو اکیڈمی، پنچکولہ کے پروگرام انچارج کے طور پر تقریباً 24 سال تک بڑی مہارت اور محنت سے کام کیا۔اس موقع پر ڈاکٹر جمیل الرحمان، ایم ایل اے مالیرکوٹلہ سردارگورلولین سنگھ سدھو آئی اے ایس ریٹائرڈ، پروفیسر سیوک نیر آئی اے ایس ریٹائرڈ، ڈاکٹر ایس ایس بھٹی، ڈاکٹر بھوپیندر سنگھ عزیز پریہار، سردار رنجودھ سنگھ، سیکرٹری پنجاب اردو اکادمی اور بہت سے دیگر سکالرز نے ڈاکٹر محمد ایوب خان کو خصوصی طور پر مبارکباد دی اور امید ظاہر کی کہ وہ اپنا تخلیقی اور تحقیقی سفر جاری رکھیں گے نیزاسی طرح اردو ادب کی خدمت کرتے رہیں گے۔ پروفیسر سیوک نیئر اس موقع پر پونے سے تشریف لائےاور انہوں نے اپنی کتابیں اکیڈمی کو پیش کیں۔ اس پروگرام کی نظامت اردو کے مشہور افسانہ نگار جناب محمد بشیر مالیرکوٹلوی نے اپنے مخصوص انداز میں کی۔
