ابوجا (یو این آئی) پولیس نے بدھ کو بتایا کہ شمالی نائیجیریا میں ایندھن کے ٹینکر میں دھماکے کے نتیجے میں تقریباً 100 افراد ہلاک اور 50 زخمی ہو گئے۔
پولیس ترجمان نے اے ایف پی کو بتایا کہ منگل کو شمالی جیگاوا ریاست میں ٹینکر کے حادثے کے بعد کئی لوگ سڑک پر گرا ہوا ایندھن جمع کر رہے تھے۔انہوں نے کہا کہ ٹینکر ماجیا قصبے میں ٹرک سے تصادم سے بچنے کے لیے مڑ گیا تھا۔
ہم نے اب تک 94 افراد کے ہلاک اور 50 کے قریب زخمی ہونے کی تصدیق کی ہے،” انہوں نے خبردار کیا کہ ہلاکتوں کی تعداد بڑھ سکتی ہے۔انہوں نے بتایا کہ حادثے کے بعد رہائشیوں کا ہجوم گاڑی کے ارد گرد جمع ہو گیا اور وہ سڑک اور نالوں میں گرا ہوا ایندھن جمع کرنے لگے۔انہوں نے کہا کہ رہائشیوں نے افسران پر "غلبہ پا لیا” جنہوں نے ان کو روکنے کی کوشش کی۔
نائجیرین میڈیکل ایسوسی ایشن نے ڈاکٹروں پر زور دیا ہے کہ وہ مریضوں کی بڑی تعداد کی مدد کے لیے قریبی ایمرجنسی رومز میں پہنچ جائیں۔افریقہ کے گنجان آباد ترین ملک میں ایندھن کے ٹینکر کے دھماکے عام ہیں جہاں سڑکوں کی حلات خراب ہے اور رہائشی اکثر حادثات کے بعد بہہ جانے والا ایندھن استعمال کرتے ہیں۔
نائیجیریا ایک بدترین اور دیرینہ معاشی بحران کا شکار ہے جس کی وجہ سے ایندھن اور بھی قیمتی شے بن گیا ہے۔گذشتہ سال صدر بولا احمد ٹینوبو کی جانب سے سبسڈی ختم کرنے کے بعد سے پیٹرول کی قیمت پانچ گنا بڑھ گئی ہے اور اکثر اس کی قلت رہتی ہے۔گذشتہ ہفتے سرکاری تیل کمپنی کی جانب سے صرف ایک ماہ کے دوران دوسری بار قیمتوں میں اضافے کے بعد عوام میں مایوسی مزید بڑھ گئی۔
