ایمسٹرڈیم (یو این آئی) غزہ پر اسرائیلی مظالم کے خلاف پاکستان سمیت مختلف ممالک میں لاکھوں افراد فلسطینیوں سے اظہار یکجہتی کے لیے سڑکوں پر نکل آئے۔ غیر ملکی خبر رساں ادارے کے مطابق پاکستان میں مظلوم فلسطینیوں سے اظہار یکجہتی کے لیے احتجاج کیا گیا۔ دوسری جانب ڈچ پولیس کے مطابق نیدرلینڈز کے دارالحکومت ایمسٹرڈیم میں ڈھائی لاکھ افراد نےغزہ پر اسرائیلی مظالم کے خلاف مارچ کیا جس دوران مظاہرین کی جانب سے حکومت سے اسرائیل سے تعلقات ختم کرنے کا مطالبہ کیا گیا۔ غزہ پر اسرائیلی مظالم کے خلاف ترکیے میں ہزاروں لوگ سراپا احتجاج رہے، دارالحکومت انقرہ اور استنبول میں ہزاروں مظاہرین نے فلسطینیوں کی نسل کشی بند کرنے کا مطالبہ کیا۔ مراکش کے دارالحکومت رباط میں غزہ کے حق میں ریلی نکالی گئی جس دوران اسرائیل سے نسل کشی بند کرنے کا مطالبہ کیا۔ اسرائیل کے دارالحکومت تل ابیب میں ہزاروں افراد سڑکوں پر نکل آئے اور حکومت سے جنگ بندی اور یرغمالیوں کی رہائی کا مطالبہ کیا۔ کیتھولک مسیحوں کے مذہبی پیشوا پوپ لیو نے امن مذاکرات میں نمایاں پیش رفت کی کامیابی کی امید ظاہر کرتے ہوئے فوری جنگ بندی کا مطالبہ کیا۔ علاوہ ازیں اسرائیلی حملوں کا سلسلہ نہ رک سکا اور 24 گھنٹوں کے غزہ میں مزید 77فلسطینی شہید ہوگئے۔
