لاہور(یواین آئی )پاکستانی کرکٹ کے ابھرتے ہوئے ستارے اور مایہ ناز اوپننگ بیٹر صاحبزادہ فرحان نے ٹی ٹونٹی ورلڈ کپ میں اپنی تاریخی کارکردگی کا لوہا منواتے ہوئے فروری کے لیے ’آئی سی سی پلیئر آف دی منتھ‘ کا اعزاز اپنے نام کر لیا ہے۔ انٹرنیشنل کرکٹ کونسل (آئی سی سی) نے فروری کے بہترین کھلاڑی کا اعلان کر دیا ہے جس میں پاکستانی اوپنر نے عالمی حریفوں کو پیچھے چھوڑتے ہوئے یہ ٹرافی اپنے نام کی۔ہندوستان اور سری لنکا کی مشترکہ میزبانی میں منعقدہ ٹی ٹونٹی ورلڈ کپ 2026ء صاحبزادہ فرحان کے لیے ریکارڈز کی برسات ثابت ہوا۔ انہوں نے میگا ایونٹ کے محض 6 میچز میں 383 رنز بنا کر ٹورنامنٹ کے سب سے کامیاب بلے باز ہونے کا اعزاز حاصل کیا۔ وہ ورلڈ کپ کے ایک ہی ایڈیشن میں دو سنچریاں داغنے والے دنیا کے پہلے بیٹر بن گئے۔ فرحان نے ٹی ٹونٹی ورلڈ کپ کے ایک ایڈیشن میں سب سے زیادہ رنز بنانے کا نیا عالمی ریکارڈ بھی قائم کر دیا ہے۔آئی سی سی نے فروری کے بہترین کھلاڑی کے لیے صاحبزادہ فرحان کے ساتھ انگلینڈ کے جارح مزاج بیٹر ول جیکس اور امریکا کے شیڈلے وین شیلوک کو نامزد کیا تھا، تاہم پاکستانی اوپنر کی غیر معمولی فارم اور ورلڈ کپ میں ان کے ریکارڈ ساز اعداد و شمار نے انہیں اس دوڑ میں واضح برتری دلائی اور وہ پہلی بار اس باوقار اعزاز کے حقدار قرار پائے۔
