اعجاز ڈار
سرینگر، پاکستان جن مشکل ترین حالات سے گزر رہا ہے کہ وہ ہم سب خاص کر پڑوسی ممالک کیلئے باعث تشویش اور لمحہ فکریہ ہے کی بات کرتے ہوئے صدرِ نیشنل کانفرنس ڈاکٹر فاروق عبداللہ نے کہا کہ پاکستان کے موجودہ تشویشناک حالات و واقعات کا اثر ہمارے ملک سمیت تمام دیگر پڑوسی ممالک پڑنے کا قوی امکان ہے۔تفصیلات کے مطابق پارٹی ہیڈکوارٹر نوائے صبح کمپلیکس میں ذرائع ابلاغ کے نائندوں کے سوالوں کے جواب دیتے ہوئے انھوں نے کہا کہ پاکستان میں عدم استحکام پورے برصغیر کیلئے برا ہے۔ اُن کا کہنا تھا کہ پاکستان کے موجودہ تشویشناک حالات و واقعات کا اثر ہمارے ملک سمیت تمام دیگر پڑوسی ممالک پڑنے کا قوی امکان ہے۔ انہوں نے کہاکہ ہم پاکستان کو یہ نہیں بتاسکتے کہ جمہوریت اور سیاسی کو کیسے چلایا جاسکتا ہے لیکن ہم اُمید کرتے ہیں کہ سبھی فریق سمجھ بوجھ کیساتھ کام لیں گے، قانون کی حکمرانی قائم ہوگی ،جمہوری ادارے مضبوط ہونگے اور امن کا بول بالا ہوگا۔ ڈاکٹر فاروق عبداللہ نے کہا کہ ایک پڑوسی ملک کی تعمیر و ترقی کا راز دوسرے پڑوسی کے استحکام میں ہی مضمر ہوتا ہے۔ اللہ کرے پاکستان کے حالات جلد از جلد ٹھیک ہوجائیں ، جمہوریت اور قانون کی بالادستی ہو اور جلد از جلد انتخابات کا انعقاد ہوکر ایک عوامی منتخبہ حکومت کا قیام عمل میں آجائے۔ اس سے قبل ڈاکٹر فاروق عبداللہ نے آج وادی کے علاوہ خطہ چناب سے آئے ہوئے مختلف عوامی وفود، پارٹی عہدیداروں اور کارکنوں کیساتھ ملاقات کی اور ان کے مسائل و مشکلات سُنے اور پارٹی پروگراموں اور سرگرمیوں کے بارے میں جانکاری حاصل کی۔ انہوں نے پارٹی سے وابستہ افراد پر زور دیا کہ وہ پارٹی کی عوامی رابطہ مہم میں سرعت لائی جائے اور اپنی جماعت کا منشور اور لائحہ عمل گھر گھر پہنچائے جائے اور ساتھ ہی لوگوں کے مسائل و مشکلات کی جانکاری حاصل کی۔
