مصر:مصری وزارت خارجہ کے جاری کیے گئے بیان میں کہا گیا ہے کہ عرب ممالک کے سربراہی اجلاس میں فلسطین کی تازہ صورتحال پر تبادلہ خیال کیا جائے گا۔’ وزارت خارجہ کا یہ بیان اتوار کے روز سامنے آیا ہے۔خیال رہے عرب ممالک کا سربراہی اجلاس ایسے وقت میں ہو رہا ہے جب امریکی صدر ڈونلڈ ٹرمپ نے غزہ کی صفائی کے نام پر فلسطینیوں کے انخلاء کا منصوبہ پیش کیا ہے اور کہا ہے کہ فلسطینیوں کو مصر اور اردن منتقل کر دیا جائے۔وزارت خارجہ کی طرف سے جاری کیے گئے بیان میں مزید کہا گیا ہے کہ عرب ممالک کا سربراہی اجلاس عرب ممالک کے سربراہان کے ساتھ مشاورت کے بعد بلایا گیا ہے۔ تاکہ فلسطین و فلسطین کاز کے حوالے سے بات چیت کی جا سکے۔ بتایا گیا ہے کہ اس معاملے میں عرب لیگ کے سربراہ بحرین کے ساتھ بھی مشاورت کی گئی ہے۔
یاد رہے جمعہ کے روز مصری وزیر خارجہ بدر نے اردن، سعودی عرب اور متحدہ عرب امارات سمیت علاقائی شراکت داروں کے ساتھ ٹرمپ کے غزہ اور فلسطینیوں سے متعلق منصوبے پر بات چیت کی ہے۔ تاکہ ٹرمپ منصوبے کی سخت مذمت کی جائے اور فلسطینیوں کو ان کی سرزمین سے بےدخل نہ کیا جائے۔واضح رہے ٹرمپ منصوبے کی پوری دنیا میں شدید مذمت کی جا رہی ہے۔ عرب ممالک نے اس پر شدید ردعمل کا اظہار کیا ہے اور اس تجویز کو مسترد کیا ہے۔
