دبئی (یو این آئی) ہندوستانی کرکٹ ٹیم نے متحدہ عرب امارات کے خلاف ایشیا کپ کے پہلے میچ کے لیے اپنی حتمی الیون پر ابھی تک کوئی فیصلہ نہیں کیا ہے اور گیندبازی کمبینیشن اور پچ کی صورتحال پر گہری نظر رکھی جا رہی ہے۔بولنگ کوچ مورنے مورکل نے اشارہ دیا ہے کہ ٹیم پوری طرح تیار ہے، لیکن حتمی انتخاب اس بات پر منحصر ہوگا، کہ میچ کے دن دبئی کی پچ کیسی رہتی ہے، جس میں فاسٹ اور اسپن دونوں آپشنز پر غور کیا جا رہا ہے۔مورکل نے اس بات پر زور دیا کہ اس سال کی صورتحال آئی سی سی چیمپئنز ٹرافی کے دوران ہندوستان کے سابقہ دورے سے مختلف ہے، جہاں چار اسپنرز کے حملے کا کامیاب استعمال کیا گیا تھا۔مورکل نے کہا کہ ’’ہمیں دیکھنا ہوگا کہ وکٹ کیسا رہتا ہے۔ پہلے اس سطح پر کافی کرکٹ کھیلا گیا تھا اور یہ تھکا ہوا لگ رہا تھا، لیکن اس بار میدان پر کافی گھاس ہے۔ آج رات ہم پچ کا پہلا معائنہ کریں گے اور اس کے مطابق منصوبہ بنائیں گے۔‘‘مورکل نے زور دے کر کہا کہ ٹیم نے تمام اسٹریٹجک آپشنز کھلے رکھے ہیں اور پچ کا جائزہ لینے کے بعد حتمی فیصلہ کرے گی۔اگر ہندوستان ایک اضافی فاسٹ بولر کو شامل کرتا ہے، تو بائیں ہاتھ کے تیز گیند باز ارشدیپ سنگھ نئی گیند کے ساتھ جسپریت بمراہ کا ساتھ دے سکتے ہیں، جبکہ ہرشیت رانا اور تجربہ کار آل راؤنڈر ہاردک پانڈیا دیگر ممکنہ آپشن ہیں۔اسپن کے محاذ پر ورون چکرورتی، اکشر پٹیل اور کلدیپ یادو دعویداری میں ہیں۔مورکل نے کلدیپ کے رویے اور پیشہ ورانہ طرز عمل کی تعریف کرتے ہوئے کہا کہ انگلینڈ کے خلاف حالیہ ٹیسٹ سیریز میں محدود کھیل کے باوجود، یہ بائیں ہاتھ کا اسپنر سخت محنت کر رہا ہے اور وائٹ بال کرکٹ میں اچھا کھیلنے کے لیے تیار ہے۔ایشیا کپ کے پہلے میچ کے لیے ہندوستانی ٹیم میں کپتان سوریہ کمار یادو، شبھمن گل، ابھیشیک شرما، تلک ورما، ہاردک پانڈیا، شیوم دوبے، جیتیش شرما، اکشر پٹیل، جسپریت بمراہ، ورون چکرورتی، ارشدیپ سنگھ، کلدیپ یادو، سنجو سیمسن، ہرشیت رانا اور رنکو سنگھ شامل ہیں۔ مورکل نے دہرایا کہ کوچنگ اسٹاف واضح مقاصد اور حکمت عملی کے ساتھ ٹریننگ سیشنز پر توجہ مرکوز کر رہا ہے۔انہوں نے کہا کہ ’’ہم صرف اسی پر قابو رکھ سکتے ہیں، جس پر ہمارا اختیار ہے۔ ہماری تیاری اور ہم حالات کے مطابق کیسے ڈھلتے ہیں۔‘‘حتمی الیون کا انتخاب 10 ستمبر کو پچ کے تفصیلی معائنے کے بعد ہونے کی توقع ہے، جس میں ہندوستان یو اے ای کی بیٹنگ لائن اپ کا سامنا کرنے کے لیے فاسٹ اور اسپن کے درمیان توازن پر احتیاط سے غور کرے گا۔
