نئی دہلی، ناصر اور جنید نامی نوجوان کا بولیرو سمیت اغوا کر ہریانہ میں بھیوانی ضلع کے لوہارو تھانہ حلقہ میں گاڑی سمیت جلا کر قتل کر دینے کے معاملے میں تقریباً دو ماہ سے فرار چل رہے دو مزید ملزمین بھیوانی باشندہ نریندر کمار عرف مونو رانا اور مونو عرف گوگی کو پولس نے دہرادون کی پہاڑیوں سے حراست میں لے کر گرفتار کر لیا ہے۔ اس معاملے کے کچھ نامزد ملزمین اب بھی فرار ہیں جن کی تلاش ہنوز جاری ہے۔آئی جی رینج گورو شریواستو نے بتایا کہ 16 فروری کو گھاٹمیکا گاؤں باشندہ اسماعیل میو نے جنید اور ناصر کے اغوا ہونے کی رپورٹ تھانہ گوپال گڑھ میں درج کرائی تھی۔ بدمعاش دونوں نوجوانوں کو بولیرو سمیت اغوا کر لے گئے تھے جنھوں نے ہریانہ میں بھیوانی ضلع کے تھانہ لوہارو علاقہ میں بولیرو سمیت جلا کر دونوں نوجوانوں کا قتل کر دیا تھا۔ بعد میں پولس کو گاڑی سے ناصر و جنید کے ڈھانچے ملے تھے۔ اس معاملے میں پولس نے فوراً کارروائی کر 17 فروری کو فیروزپور جھرکا باشندہ ملزم رنکو سینی کو گرفتار کیا تھا جسے 13 دن تک حراست میں پوچھ تاچھ کے بعد جیل بھیج دیا گیا تھا۔گورو شریواستو کا کہنا ہے کہ ناصر-جنید قتل معاملے میں انل پرجاپتی (باشندہ تھانہ نگینہ ضلع نوح میوات)، مونو رانا عرف نریندر (باشندہ تھانہ انڈسٹریل ایریا ضلع بھیوانی)، گوگی عرف مونو (باشندہ تھانہ شہر بھیوانی)، کالو عرف کرشن جاٹ (باشندہ تھانہ صدر ضلع کیتھل)، وکاس آریہ (باشندہ تھانہ سول لائنس ضلع جیند)، کشور سین (باشندہ تھانہ گھروندا ضلع کرنال)، ششی کانت باشندہ تھانہ مونک ضلع کرنال) اور شریکانت (باشندہ تھانہ نگینہ ضلع نوح میوات) کی شناخت کر 5-5 ہزار روپے انعام اعلان کیا تھا، جسے بعد بڑھا کر 10-10 ہزار روپے کیا گیا۔بہرحال، ناصر-جنید قتل معاملے کے ملزمین کی گرفتاری کیلئے اے ایس پی کرولی سدھانت شرما کی قیادت میں تشکیل کی گئی اسپیشل ٹیموں کے ذریعہ مدھیہ پردیش کے ریوا اور سدی، بہار کے پٹنہ، نیپال سرحد، اڈیشہ کے کٹک، بھونیشور و بالیشور،مغربی بنگال کے ہگلی و چوبیس پرگنہ، ہریانہ کے فیروزپور جھرکا، جیند، بھیوانی، کرنال، سونی پت، پانی پت، کیتھل و یمنا نگر، ہماچل پردیش کے کوئٹا صاحب، اترپردیش کے آگرہ، کانپور، لکھنؤ، پریاگ راج و بنارس، اتراکھنڈ کے ہریدوار، رشی کیش، شیوپوری و دہرادون میں مشتبہ ٹھکانوں مثلاً مذہبی اداروں، گروکل، گئوشالہ وغیرہ میں چھاپہ ماری کی گئی اور بھیس بدل کر تلاشی بھی لی گئی۔ اسی دوران پولس کی اسپیشل ٹیم کو جانکاری ملی کہ ملزم دہرادون میں تھانہ وکاس نگر کے بٹوہی گاؤں کے پہاڑوں میں چھپا ہوا ہے۔ اس خبر کے بعد ٹیکنالوجی کا سہارا لیا گیا اور بدمعاشوں کی حرکت معلوم ہوتے ہی انسپکٹر منوج رانا یوگیندر سنگھ ہیڈ کانسٹیبل جوگیندر سنگھ کی قیادت میں ٹیم نے چھاپہ ماری کر مطلوبہ ملزم مونو اور نریندر کو پہاڑی علاقہ سے پکڑ لیا۔ جمعرات کو ایس اچ او گوپال گڑھ کے ذریعہ ان دونوں کو باضابطہ طور پر گرفتار کیا گیا۔
