بھاگلپور میں عازمینِ حج کیلئے دعائیہ و اعزازی تقریب کا شاندار انعقاد

بھاگلپور (قمر امان) بھاگلپور کے سمکچھا بھون میں ضلع کے تمام 135 عازمینِ حج کے اعزاز میں ایک پُر وقار، روحانی اور دعائیہ تقریب کا انعقاد کیا گیا،جس میں عقیدت،محبت اور خلوص کا ایک خوبصورت منظر دیکھنے کو ملا۔ اس تقریب کا مقصد عازمینِ حج کو رخصتی سے قبل دعاؤں،نیک تمناؤں اور ضروری رہنمائی سے نوازنا تھا تاکہ وہ اپنے اس مقدس سفر کو بہتر انداز میں انجام دے سکیں۔واضح رہے کہ تمام عازمینِ حج اس سے قبل مختلف تربیتی کیمپوں میں شرکت کر چکے ہیں، جہاں معروف ٹرینرز اور جید علماء کرام نے انہیں مناسکِ حج، سفری احتیاطی تدابیر اور روحانی تیاری کے حوالے سے مکمل رہنمائی فراہم کی تھی۔اس تربیت کے باعث عازمین میں ایک خاص اعتماد اور روحانی آمادگی دیکھنے کو ملی۔تقریب کے مہمانِ خصوصی ضلع مجسٹریٹ،بھاگلپور ڈاکٹر نول کشور چودھری نے اپنے خطاب میں تمام عازمینِ حج کو دل کی گہرائیوں سے مبارکباد پیش کرتے ہوئے کہا کہ حج ایک عظیم عبادت ہے جو انسان کی زندگی میں روحانی انقلاب برپا کرتی ہے۔آپ سب خوش نصیب ہیں کہ اللہ تعالیٰ نے آپ کو اپنے گھر کی حاضری کا موقع عطا فرمایا۔میری دعا ہے کہ آپ کا یہ سفر خیریت، آسانی اور قبولیت کے ساتھ مکمل ہو۔انہوں نے مزید کہا کہ ضلع انتظامیہ کی جانب سے عازمین کی سہولت کے لیے ہر ممکن اقدامات کیے جا رہے ہیں اور یہ پروگرام بھی اسی سلسلے کی ایک کڑی ہے۔ انہوں نے عازمین سے اپیل کی کہ وہ اپنے اس مقدس سفر میں ملک و ملت کی ترقی،امن و بھائی چارہ اور ضلع بھاگلپور کی خوشحالی کے لیے خصوصی دعائیں کریں۔اس موقع پر ضلع مجسٹریٹ نے تمام عازمینِ حج کو سفری کٹس بھی فراہم کیں،جن میں تولیہ، اسپرے بوتل،چشمہ اور دیگر ضروری اشیاء شامل تھیں، تاکہ دورانِ سفر انہیں کسی قسم کی پریشانی کا سامنا نہ کرنا پڑے۔تقریب میں قاضیِ شریعت،بھاگلپور مولانا مفتی خورشید انور قاسمی نے اپنے فکر انگیز خطاب میں حج کی روحانیت اور اس کے پیغام کو اجاگر کرتے ہوئے کہا کہ حج محض ایک عبادت نہیں بلکہ یہ صبر، اخلاص،اتحاد اور انسانیت کا عملی درس ہے۔عازمین کو چاہیے کہ وہ ہر عمل میں سنتِ نبوی ﷺ کو پیشِ نظر رکھیں اور اپنی نیت کو خالص رکھیں۔انہوں نے مزید تاکید کی کہ عازمین اپنے اخلاق و کردار سے اسلام کی بہترین تصویر پیش کریں اور نظم و ضبط کا خاص خیال رکھیں تاکہ یہ سفر ہر لحاظ سے کامیاب اور بابرکت ثابت ہو۔اس موقع پر ضلع انتظامیہ کی جانب سے حج تربیت میں نمایاں خدمات انجام دینے والے علماء و خادمینِ عازمینِ حج کو شال پیش کر اعزاز سے نوازا گیا۔جن میں حاجی مولانا عطاء الرحمن،حاجی مولانا مفتی خورشید انور قاسمی، حاجی مولانا اسجد ناظری نظر، حاجی مولانا الیاس قاسمی،حاجی محمد شہاب الدین،حاجی محمد امتیاز، حاجی عمر فاروق اور ڈاکٹر غلام ربانی جوہر شامل تھے۔ان شخصیات کی خدمات کو سراہتے ہوئے ضلع مجسٹریٹ نے کہا کہ ان علماء کی محنت ہی عازمین کی بہتر رہنمائی کا سبب بنی ہے۔تقریب کا آغاز اسسٹنٹ ڈائریکٹر ضلع اقلیتی فلاح بہبود شری رتن جی کے خیر مقدمی کلمات سے ہوا، جبکہ حاجی عمر فاروق نے ضلع کے عازمینِ حج کی جانب سے ضلع مجسٹریٹ ڈاکٹر نول کشور چودھری کو گلدستہ اور شال پیش کر ان کا پرتپاک استقبال کیا۔مزید برآں،مولانا عطاء الرحمن مفتاحی نے مناسکِ حج کے حوالے سے مختصر مگر جامع معلومات فراہم کیں،جس سے عازمین کو عملی رہنمائی حاصل ہوئی۔آخر میں حاجی مولانا الیاس قاسمی کی دعا پر اس روحانی اور یادگار تقریب کا اختتام ہوا۔اس پروگرام کو ضلع میں پہلی بار اس پیمانے پر منعقد کیا گیا،جس پر تمام عازمینِ حج نے خوشی اور اطمینان کا اظہار کرتے ہوئے ضلعی انتظامیہ،بالخصوص ضلع مجسٹریٹ کا تہہ دل سے شکریہ ادا کیا۔انہوں نے کہا کہ اس طرح کی تقریبات نہ صرف حوصلہ افزائی کا باعث بنتی ہیں بلکہ سفرِ حج کے لیے روحانی طور پر بھی تیار کرتی ہیں۔