نئی دہلی، آپ کے ایم ایل اے اور حج کمیٹی کے رکن حاجی یونس نے دہلی اسٹیٹ حج کمیٹی کے آج ہوئے انتخابات کو مکمل طور پر غیر آئینی قرار دیتے ہوئے اسے عدالت میں چیلنج کرنے کا انتباہ دیا ہے۔ دہلی اسٹیٹ حج کمیٹی کے ارکان کی آج منعقدہ میٹنگ کے بارے میں تفصیلی معلومات دیتے ہوئے حاجی یونس نے کہا کہ آج حج کمیٹی کے چیئرمین کا انتخاب ہونا تھا جس کے لیے تمام اراکین کو مدعو کیا گیا تھا لیکن انتخابی افسر نے دہلی حکومت اور الیکشن کے متعلقہ قواعد پر عمل نہیں کیا ، صرف بی جے پی کے رکن پارلیمنٹ گوتم گمبھیر کی منظوری اور رکن محمد سعد کی حمایت سے کوثر جہاں کو دہلی اسٹیٹ حج کمیٹی کا چیئرمین منتخب کیا گیا، جبکہ قواعد کے مطابق چھ رکنی حج کمیٹی کا کورم پورا کرنے کے لیے 4 ووٹ ضروری ہیں۔ انہوں نے کہا کہ کمیٹی کے 6 ارکان میں سے 4 ارکان کے ووٹ ڈالنے تک انتخابی عمل نامکمل مانا جائے گا۔ انہوں نے کہا کہ آج کا الیکشن مکمل طور پر میچ فکسنگ تھا۔ کانگریس کونسلر نازیہ کو ایک سوچی سمجھی حکمت عملی کے تحت آج کی میٹنگ سے غیر حاضر رکھا گیا تاکہ بی جے پی ممبران اپنے چیئرمین کو جتوا سکیں، آج کی میٹنگ میں جو کچھ بھی ہوا وہ مکمل طور پر غیر جمہوری ہے اور انتخابی عمل کا مذاق اڑانے کے مترادف ہے۔ انہوں نے کہا کہ جس تاریخ تک نازیہ کو حج کمیٹی کا رکن بنایا گیا اس وقت تک انہوں نے کارپوریشن کونسلر کا حلف بھی نہیں اٹھایا تھا، پھر انہیں کونسلر کے طور پر حج کمیٹی میں کیسے نامزد کیا گیا۔ اسی طرح محمد سعد جنہیں اسلامی اسکالر کے طور پر کمیٹی میں شامل کیا گیا ہے، ان کے پاس بھی اسلامی اسکالر کی کوئی ڈگری یا سند نہیں ہے، ان دونوں ارکان کو غیر قانونی طور پر من مانی طور پر اس کمیٹی میں نامزد کیا گیا ہے، جس کی بنیاد پر بی جے پی چیئرمین کا انتخاب کروانے میں کامیاب ہو گئی جو کہ سراسر غیر آئینی ہے، حاجی یونس نے اس انتخابی عمل کو عدالت میں چیلنج کرنے کی بات بھی کہی ہے۔حج کمیٹی کے دوسرے رکن و ایم ایل اے عبدالرحمن نے اس انتخابی عمل پر سوالیہ نشان اٹھاتے ہوئے اسے بی جے پی اور کانگریس کا گیم پلان قرار دیتے ہوئے اس کی سخت مذمت کی ہے۔ دوسری جانب دہلی پردیش عام آدمی پارٹی اقلیتی ونگ کے سوشل میڈیا اور آئی ٹی ڈپارٹمنٹ کے سربراہ حاجی مطلوب رانا نے کہا کہ ہمیں پہلے ہی خدشہ تھا کہ ایل جی نے دہلی حکومت کی سفارش کو نظرانداز کرتے ہوئے حج کمیٹی میں جس طرح من مانے طریقے سے ارکان کا انتخاب کیا ہے دہلی حکومت اور عہدیداروں پر دباو¿ ڈال کر کانگریس کی ملی بھگت سے بی جے پی کے چیئرمین کا انتخاب کیا جائے گا۔ انہوں نے کہا کہ آج کا دن دہلی اسٹیٹ حج کمیٹی کی تاریخ کا سیاہ دن ہے۔
