پٹنہ، 18 اکتوبر : صدر جمہوریہ دروپدی مرمو نے بدھ کے روز 2023-28 کی میعاد کے لیے بہار کے چوتھے زراعتی روڈ میپ کا آغاز کیا۔آج یہاں بہار کے چوتھے ایگریکلچر روڈ میپ کی شروعات کے موقع پر منعقدہ تقریب سے خطاب کرتے ہوئے محترمہ مرمو نے کہا کہ سال 2008 میں ریاست کے پہلے زراعتی روڈ میپ کے اجراء کے بعد سے ریاست نے زراعت کے شعبے میں اچھی کارکردگی کا مظاہرہ کیا ہے ۔ یہ جان کر خوشی ہوئی کہ اس مدت کے دوران ریاست میں دھان، گیہوں اور مکئی کی پیداوار دوگنی ہو گئی ہے ۔ اس عرصے کے دوران مچھلیوں، مشروم اور مکھن کی پیداوار میں بھی اضافہ ہوا ہے ۔صدر جمہوریہ نے کہا کہ بہار کے زراعتی شعبے کی صلاحیت کا اندازہ اس بات سے لگایا جا سکتا ہے کہ پہلا زرعی تحقیقی مرکز ریاست کے پوسا میں سال 1905 میں کھولا گیا تھا۔ انہوں نے کہا کہ آرگینک فارمنگ سے اچھا منافعہ حاصل ہو رہا ہے اور بہار کو اس کا فائدہ اٹھانا چاہئے ۔ بہار حکومت نے اس سمت میں کوششیں شروع کر دی ہیں اور گنگا ندی کے مضافاتی اضلاع میں اسے فروغ دے رہی ہے ۔محترمہ دروپدی مرمو نے ریاست کے کسانوں کو اپنی پیداوار کو منڈیوں تک پہنچانے کے لیے کفایتی نقل و حمل کی سہولیات فراہم کرنے کی ضرورت پر زور دیا۔ انہوں نے کہا کہ کاشتکاروں کو بڑی منڈیاں بھی مہیا کی جائیں تاکہ وہ اپنی پیداوار کی بہتر قیمت حاصل کر سکیں۔صدر جمہوریہ نے کہا کہ چھوٹے کسانوں کے پاس اپنے زراعتی کام کے لیے اعلیٰ ٹیکنالوجی استعمال کرنے کے وسائل نہیں ہیں۔ وہ گائے کے گوبر جیسے روایتی وسائل کا استعمال کرکے کاشتکاری کر رہے ہیں۔ انہوں نے بہار کی بھرپور ثقافت کی بھی تعریف کی اور کہا کہ وہ اس سے بخوبی واقف ہیں۔ انہوں نے کہا کہ آزادی سے پہلے کے دور میں اڈیشہ بھی بہار کا حصہ تھا اور اڈیشہ کی بیٹی ہونے کی وجہ سے وہ خود کو بہاری بھی کہہ سکتی ہیں۔وزیر اعلی نتیش کمار کی طرف سے بار بار بہار کا دورہ کرنے کی درخواستوں کا جواب دیتے ہوئے صدر جمہوریہ نے کہا کہ وہ آنے والے دنوں میں یقینی طور پر ریاست کا دورہ کریں گی۔ انہوں نے کہا کہ صدارتی میعاد ختم ہونے کے بعد وہ خود زراعت سے متعلق کام کرنا چاہیں گی اور یہ جاننا چاہیں گی کہ بہار میں زراعت کے روڈ میپ کو کیسے لاگو کیا گیا۔اس موقع پر گورنر راجندر وشوناتھ ارلیکر نے زراعتی پیداوار کو بڑھانے کے لیے کاشتکاری کی قدرتی روایت کو اپنانے کی ضرورت پر زور دیا۔ انہوں نے یاد کیا کہ کس طرح ایک خاتون سافٹ ویئر انجینئر نے انجینئر کی نوکری چھوڑ کر قدرتی روایات کو استعمال کرکے کاشتکاری کا کام شروع کیا تھا، اور ممبئی کی ایک کمپنی میں سافٹ ویئر انجینئر کی تنخواہ سے زیادہ پیسہ کمانے پر قادر ہوئی تھی۔تقریب سے خطاب کرتے ہوئے وزیر اعلیٰ نتیش کمار نے کہا کہ بہار نے زراعت کے شعبے میں اچھی ترقی کی ہے ۔ پہلے زراعتی روڈ میپ کے اجراء کے بعد سے ریاست میں زراعتی پیداوار میں نمایاں اضافہ ہوا ہے ۔ انہوں نے یاد دلایا کہ کس طرح بہار کے کسانوں نے چین کے دھان کی کاشت کے ریکارڈ کو پیچھے چھوڑ دیا۔ انہوں نے کہا کہ پہلے زراعتی روڈ میپ کے نفاذ کے بعد بہار کو زراعت میں بہترین کارکردگی کے لئے متعدد قومی اعزازات سے نوازا گیا۔نائب وزیر اعلیٰ تیجسوی پرساد یادو نے کہا کہ ریاست کے پہلے زراعتی روڈ میپ کے اجراء کے بعد بہار کی ہمہ گیر ترقی ہوئی ہے ۔ انہوں نے ذات پر مبنی سروے کے لیے وزیر اعلیٰ کا شکریہ ادا کرتے ہوئے کہا کہ حال ہی میں بہار میں ذات کا سروے کرایا گیا، جو 1931 میں ملک میں ہونے والی ذاتوں کی مردم شماری کے بعد اس طرح کی پہلی مشق تھی۔
