گاندھی نگر، 30 اکتوبر : وزیر اعظم نریندر مودی نے پیر کو گجرات کے مہسانہ ضلع کے دبھوڈا گاؤں میں 5950 کروڑ روپے کی لاگت والے مختلف ترقیاتی منصوبوں کا افتتاح اور سنگ بنیاد رکھا۔مسٹر مودی کے ہاتھوں کئے گئے مختلف ترقیاتی منصوبوں کا افتتاح اور سنگ بنیاد رکھنے میں انڈین ریلویز، گجرات ریل انفراسٹرکچر ڈیولپمنٹ کارپوریشن (GRIDE)، آبی وسائل کے محکمہ، پانی کی فراہمی کا محکمہ، سڑکیں اور ہاؤسنگ ڈیپارٹمنٹ اور شہری ترقیات کے محکمے کے ترقیاتی کام شامل ہیں۔ مہسانہ، احمد آباد، بنااس کانٹھا، سابر کانٹھا، مہی ساگر، گاندھی نگر اور پٹن سمیت گجرات کے سات اضلاع کو ان ترقیاتی کاموں کا فائدہ ملے گا۔ان تمام اضلاع کو دیئے جانے والے کل 16 ترقیاتی منصوبوں کے تحفے کے تحت آٹھ منصوبوں کا افتتاح اور آٹھ کا سنگ بنیاد رکھا گیا۔ محکمہ ریلوے اور جی آر آئی ڈی ای کے دو پروجیکٹ مہسانہ اور احمد آباد میں افتتاح کے لیے تیار تھے ۔ مہسانہ میں نیو بھنڈو سے نیو سانند تک مغربی ڈیڈیکیٹڈ فریٹ کوریڈور سیکشن، 24 کلومیٹر لمبی کنیکٹنگ لائنوں کے ساتھ 77 کلومیٹر برقی ڈبل لائن کا افتتاح کیا گیا۔اس کے علاوہ وزیر اعظم نے ویرمگام سے سماکھیالی تک 182 کلومیٹر طویل ریلوے لائن کو ڈبل کرنے کے کام کا افتتاح کیا۔ یہ لائن احمد آباد، سریندر نگر، موربی اور راجکوٹ اضلاع کا احاطہ کرے گی۔ اس کے علاوہ گجرات ریل انفراسٹرکچر ڈیولپمنٹ کارپوریشن کے ذریعہ مہسانہ کٹوسن-بیچراجی کے درمیان 29.65 کلومیٹر ریلوے پروجیکٹ کا بھی افتتاح کیا گیا۔ اس پروجیکٹ سے منڈل بیچراجی اسپیشل انویسٹمنٹ ریجن (SIR-SIR) میں کام کرنے والی کمپنیوں کو فائدہ ہوگا۔ ریلوے اور GRID کے ان پروجیکٹوں کی لاگت 5130 کروڑ روپے ہے ۔مہسانہ ضلع کے وجاپور اور مانسا تحصیل کے ڈیلٹا علاقے میں مختلف تالابوں کے ری چارج کا کام اور دریائے سابرمتی پر والاسانہ بیراج کے تعمیراتی کام کا افتتاح کیا گیا۔ اس کے علاوہ مہی ساگر ضلع میں پنم ریزروائر پر مبنی لفٹ ایریگیشن پروجیکٹ کا سنگ بنیاد رکھا گیا جو سنت رام پور تحصیل کے مختلف تالابوں کو جوڑے گا۔ ان منصوبوں کی لاگت 270 کروڑ روپے ہے ۔بناسکانٹھا میں محکمہ واٹر سپلائی کے تین ترقیاتی پروجیکٹوں کا افتتاح کیا گیا، جب کہ مہسانہ میں ایک پروجیکٹ کا سنگ بنیاد رکھا گیا۔ ان میں پالن پور گروپ پیکیج 1 (پارٹ-اے ) اور پالن پور گروپ پیکج 2 کے کاموں کا افتتاح کیا گیا۔ اس کے علاوہ دھروئی ڈیم پر مبنی 80 ایم ایل ڈی صلاحیت والے پانی صاف کرنے والے پلانٹ کا افتتاح کیا گیا اور مہسانہ میں دھروئی اگمنٹیشن پارٹ-2 کے کام کا سنگ بنیاد رکھا گیا۔ ان چار منصوبوں کی کل لاگت 210 کروڑ روپے ہے ۔سابر کانٹھا میں نرودا- دہگام- ہرسول- دھانسورہ سڑک کو فور لین بنانے کے کام کا سنگ بنیاد رکھا گیا۔ اس کی لاگت 170 کروڑ روپے ہے ۔ گاندھی نگر، پٹن، بناسکانٹھا، سابر کانٹھا اور مہسانہ اضلاع میں شہری ترقیات کے محکمے کی جانب سے مختلف پروجیکٹوں کا سنگ بنیاد رکھا گیا۔ اس کے تحت گاندھی نگر ضلع کی کلول میونسپلٹی کے سیوریج اور سیپج مینجمنٹ کی توسیع کا پہلا مرحلہ شروع کیا جائے گا۔ پٹن ضلع کے سدھ پور میں 13.50 ایم ایل ڈی صلاحیت کے سیوریج ٹریٹمنٹ پلانٹ، بناسکانٹھا ضلع میں پالن پور میونسپلٹی کے لیے سیوریج ٹریٹمنٹ پلانٹ، سابر کانٹھا کے بیاڈ میں 05.07 ایم ایل ڈی صلاحیت کے سیوریج ٹریٹمنٹ پلانٹ اور مہسانہ ضلع کے وڈ نگر میں زیر زمین نکاسی آب کے نظام کے کام کا سنگ بنیاد رکھا۔ ان تمام پروجیکٹوں کی کل لاگت 170 کروڑ روپے ہے ۔خیال رہے کہ مسٹر مودی گجرات کے دو روزہ دورے پر آج صبح احمد آباد پہنچے ۔ وہاں سے وہ امباجی گئے اور امباجی مندر میں پوجا اور درشن کرنے کے بعد دوپہر کو مہسانہ کے ڈبوڈا میں مختلف ترقیاتی پروجیکٹوں کا افتتاح کیا اور سنگ بنیاد رکھا۔
