نئی دہلی، مشہور اسلامی دانشور پدم شری پروفیسر اخترالواسع نے رئیس القلم حضرت مولانا یسین اختر مصباحی کے سانحہ ارتحال پر اپنے گہرے رنج و غم کا اظہار کرتے ہوئے کہا کہ مولانا یسین اختر مصباحی صاحب علم کا سمندر تھے لیکن اپنی بے پایاں علمی فتوحات کے باوجود انتہائی متواضع اور منکسرالمزاج شخصیت کے مالک تھے۔ وہ قلم کے دھنی تو تھے ہی، ادارہ سازی میں بھی انہیں کمال حاصل تھا اور دارالقلم جیسا ادارہ ان کی یادگار ہے۔ وہ علماء اہل سنت میں انتہائی متوازن فکر کے مالک تھے۔ ان کی رائے بہت صائب ہوتی تھی۔ پروفیسر اخترالواسع نے کہا کہ یوں تو مولانا سے ان کا تعلق تقریباً چار دہائیوں سے زیادہ پر محیط تھا لیکن درگاہ کمیٹی اجمیر شریف میں ان کی ممبری کے زمانے میں ان کی شخصیت کا انہیں بھرپور اندازہ ہوا جس کے گہرے نقوش آج تک مرتسم ہیں۔ اللہ انہیں اپنے جوار رحمت میں جگہ دے اور ان کے پسماندگان اور عقیدت مندوں کو صبرجمیل کی توفیق عطا فرمائے۔
