ممبئی ، پریس ریلیز،ہمارا سماج:ممبئی میں بعد نمازِ جمعہ شہر کی معروف و تاریخی ہانڈی والی مسجد، سیفی جبلی اسٹریٹ میں آل انڈیا سنی جمعیۃ العلماء، رضا اکیڈمی اور جمعیۃ علمائے اہلِ سنت ممبئی کے زیرِ اہتمام یومِ قدس نہایت عقیدت، وقار اور ملی جوش و جذبے کے ساتھ منایا گیا۔ اس موقع پر مسجدِ اقصیٰ کی آزادی اور فلسطین کے مظلوم عوام کے ساتھ اظہارِ یکجہتی کے لیے ایک بامقصد اجتماع منعقد کیا گیا جس میں ممبئی اور اس کے مضافاتی علاقوں سے تعلق رکھنے والے علمائے کرام، ائمہ مساجد، دینی و سماجی شخصیات، طلبہ اور عوام الناس کی بڑی تعداد شریک ہوئی۔یہ اجتماع محافظِ ناموسِ رسالت، اسیرِ حضور مفتی اعظم ہند الحاج حضرت محمد سعید نوری حفظہ اللہ (بانی و سربراہ رضا اکیڈمی و نائب صدر آل انڈیا سنی جمعیۃ العلماء) کی سرپرستی اور شہزادۂ شیرِ ملت حضرت علامہ اعجاز احمد کشمیری حفظہ اللہ (خطیب و امام ہانڈی والی مسجد و صدر جمعیۃ علمائے اہلِ سنت ممبئی) کی قیادت میں منعقد ہوا۔ اجتماع کا مقصد امتِ مسلمہ کے دلوں میں مسجدِ اقصیٰ کے تقدس و عظمت کو اجاگر کرنا اور فلسطین کے مظلوم مسلمانوں کے ساتھ دینی و انسانی یکجہتی کا اظہار کرنا تھا۔اجتماع میں شریک افراد نے ہاتھوں میں پلے کارڈز اور بینرز اٹھا رکھے تھے جن پر “مسجدِ اقصیٰ کی حفاظت کرو”، “فلسطین کو آزاد کرو”، “ہم فلسطینیوں کے ساتھ ہیں” اور “صیہونی مظالم بند کرو” جیسے پیغامات درج تھے۔ اس موقع پر فضا مسجدِ اقصیٰ کی آزادی اور فلسطینی عوام کے حق میں فلک شگاف نعروں سے گونجتی رہی۔اجتماع سے خطاب کرتے ہوئے حضرت علامہ اعجاز احمد کشمیری حفظہ اللہ نے کہا کہ یومِ قدس دراصل امتِ مسلمہ کے ضمیر کی بیداری اور مظلوم انسانیت کے ساتھ یکجہتی کے اظہار کا دن ہے۔ انہوں نے کہا کہ فلسطین انبیائے کرام علیہم السلام کی سرزمین ہے اور مسجدِ اقصیٰ مسلمانوں کے ایمان، تاریخ اور تہذیبی شناخت کا اہم ترین مرکز ہے۔ انہوں نے اس بات پر زور دیا کہ مسجدِ اقصیٰ کی آزادی کا مسئلہ صرف فلسطین کا نہیں بلکہ پوری امتِ مسلمہ کے ایمان اور تاریخ سے وابستہ مسئلہ ہے۔اس موقع پر کلیدی خطاب کرتے ہوئے اسیرِ حضور مفتی اعظم ہند الحاج حضرت محمد سعید نوری حفظہ اللہ نے فرمایا کہ مسجدِ اقصیٰ مسلمانوں کا قبلۂ اول اور تاریخِ اسلام کی ایک عظیم علامت ہے۔ یہی وہ مقدس مقام ہے جہاں سے حضور اکرم ﷺ کو شبِ معراج آسمانوں کی سیر کرائی گئی۔ انہوں نے کہا کہ مسجدِ اقصیٰ کے ساتھ مسلمانوں کی محبت اور عقیدت دراصل ان کے ایمان کا حصہ ہے، اور یومِ قدس کا پیغام یہی ہے کہ مسلمان اپنے قبلۂ اول کے تحفظ اور مظلوم انسانیت کی حمایت کے لیے متحد رہیں۔اجتماع میں شریک علمائے کرام اور مقررین نے اس بات پر بھی زور دیا کہ عالمی امن، انصاف اور انسانی وقار کے قیام کے لیے ضروری ہے کہ مظلوم قوموں کے حقوق کا احترام کیا جائے اور ظلم و جبر کے خاتمے کے لیے مؤثر اقدامات کیے جائیں۔اجتماع کے اختتام پر مسجدِ اقصیٰ کی آزادی، فلسطین کے مظلوم عوام کی نصرت، امتِ مسلمہ کے اتحاد اور ملک میں امن و سلامتی کے لیے خصوصی دعا کی گئی۔
