لاہور، (یواین آئی )پاکستان سپر لیگ (پی ایس ایل) کے گیارہویں ایڈیشن کے ہنگامے شروع ہونے کو ہیں، جس کے لیے آسٹریلیا اور نیوزی لینڈ کے نامور کرکٹرز پاکستان پہنچ گئے ہیں۔ لیگ کی مختلف فرنچائزز نے اپنے غیر ملکی کھلاڑیوں کی آمد کی تصدیق کر دی ہے، جس سے ایونٹ کی رونقوں میں اضافہ ہو گیا ہے۔اسلام آباد یونائیٹڈ نے سوشل میڈیا پر ایک دلچسپ ویڈیو شیئر کی ہے جس میں نیوزی لینڈ کے مایہ ناز بیٹر ڈیوون کونوے اور مارک چیپ مین کو ایئرپورٹ پر دیکھا جا سکتا ہے۔ دونوں کھلاڑیوں نے پاکستانی مداحوں کو سرپرائز دیتے ہوئے اردو زبان میں پیغام دیا، جس میں مارک چیپ مین کا کہنا تھا کہ "ہم آگئے ہیں شیروز”۔ فرنچائز نے اس ویڈیو کو مداحوں کے لیے ‘عیدی قرار دیا ہے۔دوسری جانب ملتان سلطانز کے کیمپ سے بھی بڑی خبر سامنے آئی ہے جہاں آسٹریلوی لیجنڈ اسٹیو اسمتھ لاہور پہنچ چکے ہیں۔ ان کے ہمراہ تبریز شمسی، جوش فلپ، پیٹر سڈل اور ٹیم کے کوچ ٹم پین سمیت تمام غیر ملکی کھلاڑیوں نے اپنی ٹیم کو جوائن کر لیا ہے۔جہاں کھلاڑیوں کی آمد سے جوش و خروش بڑھا ہے، وہی پی سی بی کے حالیہ فیصلوں نے شائقین کو کچھ مایوس بھی کیا ہے۔ پی سی بی نے اخراجات میں کمی کے لیے ٹورنامنٹ کو صرف دو شہروں تک محدود کر دیا ہے۔ اس بار میچز تماشائیوں کے بغیر کھیلے جائیں گے۔ چیئرمین پی سی بی نے شائقین سے معذرت کرتے ہوئے اعلان کیا ہے کہ فروخت شدہ ٹکٹوں کے پیسے واپس کر دیے جائیں گے۔
