ڈھاکہ، ( یو این آئی)بنگلہ دیش کرکٹ بورڈ نے پاکستان سپر لیگ ( پی ایس ایل) میں پشاور زلمی کی نمائندگی کرنے والے فاسٹ بالرز شریف الاسلام اور ناہید رانا کے این او سی میں ایک دن کی توسیع کر دی ہے۔بنگلہ دیش کرکٹ بورڈ کی جانب سے آج جاری کردہ پریس ریلیز کے مطابق، یہ فیصلہ پاکستان کرکٹ بورڈ (پی سی بی) اور پی ایس ایل فرنچائز پشاور زلمی کی خصوصی درخواست پر کیا گیا ہے۔بیان میں کہا گیا ہے کہ شریف الاسلام اور ناہید رانا کو اصل میں 12 اپریل 2026 تک این او سی جاری کیا گیا تھا۔ اب نئے انتظام کے تحت دونوں کھلاڑیوں کو 13 اپریل کو ملتان سلطانز کے خلاف ہونے والے میچ میں شرکت کے لیے پاکستان میں قیام کی اجازت دے دی گئی ہے۔”پشاور زلمی اس وقت پوائنٹس ٹیبل پر سرفہرست ہے، جس نے اپنے پانچ میں سے چار میچوں میں کامیابی حاصل کی ہے۔ پیر کے روز ہونے والا مقابلہ ملتان سلطانز کے خلاف ان کی پوزیشن مزید مستحکم کرنے کے لیے اہم ہے۔شریف الاسلام اور ناہید رانا دونوں کو نیوزی لینڈ کے خلاف 17 اپریل سے شروع ہونے والی تین ون ڈے میچوں کی سیریز کے ابتدائی دو میچوں کے لیے بنگلہ دیش کے 15 رکنی اسکواڈ میں شامل کیا گیا ہے۔ پی ایس ایل کا میچ کھیلنے کے فوراً بعد دونوں کھلاڑی قومی ٹیم کو جوائن کرنے کے لیے روانہ ہو جائیں گے۔
