دوحہ (ہ س)۔ قطر ایئرویز نے امریکی صدر ڈونالڈ ٹرمپ کے خلیجی ممالک کے دورے کے دوران 160 جیٹ طیارے خریدنے کے لیے امریکی طیارہ ساز کمپنی بوئنگ کے ساتھ 200 ارب ڈالر کا معاہدہ کیا ہے۔ اس تاریخی معاہدے پر بدھ کو دوحہ میں امریکی صدر ڈونالڈ ٹرمپ اور قطر کے امیر شیخ تمیم بن حمد الثانی کی موجودگی میں دستخط کیے گئے۔صدر ٹرمپ نے تقریب کے دوران کہا، ’’یہ 200 ارب ڈالر سے زیادہ کا معاہدہ ہے اور اس میں 160 طیارے شامل ہیں۔ یہ واقعی شاندار ہے۔‘‘ انہوں نے بوئنگ کے سی ای او کیلی اورٹبرگ کو مبارکباد دی اور اسے ’’ریکارڈ ڈیل‘‘ قرار دیا۔ تقریب میں امریکی وزیر دفاع پیٹ ہیگسیتھ نے بھی قطر کے ساتھ دفاعی تعاون کے حوالے سے کئی اہم معاہدوں پر دستخط کیے۔ ان میں ایم کیو-9 بی ڈرون اور ایف ایس- ایل ای ڈی ایس دفاعی نظام کے لیے پیشکش اور قبولیت کے خطوط شامل ہیں۔ اس کے ساتھ ہی ٹرمپ نے قطر اور امریکہ کے درمیان مشترکہ دفاعی تعاون کے اعلامیے پر بھی دستخط کیے۔معاہدے کے بعد قطر کے امیر نے کہا کہ دونوں ممالک کے درمیان ’’بہترین بات چیت‘‘ ہوئی اور اب تعلقات ’’ایک نئی سطح پر پہنچ گئے ہیں۔‘‘ ٹرمپ نے بھی امیر کی تعریف کرتے ہوئے کہا، ’’ہم ایک طویل عرصے سے دوست ہیں اور یہ آدمی واقعی شاندار ہے۔‘‘امریکی صدر ٹرمپ ان دنوں خلیج کے چار روزہ دورے پر ہیں۔ قطر پہنچنے سے پہلے انہوں نے سعودی عرب کا دورہ کیا، جو کہ 2020-2016 کے اپنے صدارتی دور میں ان کے پہلے غیر ملکی دورے کی منزل بھی تھی۔ ان کا آخری پڑاو متحدہ عرب امارات (یو اے ای) ہوگا۔
