دوحہ، ( یو این آئی) کناڈا کی ابھرتی ہوئی ٹینس اسٹار وکٹوریہ ممبوکو نے اپنی شاندار فارم اور فولادی اعصاب کا مظاہرہ کرتے ہوئے قطر ٹوٹل انرجیز اوپن کے کوارٹر فائنل میں دفاعی آسٹریلین اوپن چیمپئن اور سیکنڈ سیڈ ایلینا ریباکینا کو شکست دے کر ٹورنامنٹ سے باہر کر دیا۔عالمی نمبر 13 ممبوکو نے فیصلہ کن سیٹ میں خسارے سے نکل کر عالمی نمبر 3 ریباکینا کے خلاف 7-5، 4-6 اور 6-4 سے کامیابی حاصل کی۔ 2 گھنٹے 23 منٹ تک جاری رہنے والے اس اعصاب شکن مقابلے میں ممبوکو نے اہم لمحات میں اپنی جارحانہ حکمتِ عملی برقرار رکھی اور جیت اپنے نام کی۔ پہلے سیٹ میں ممبوکو نے 2-0 کی برتری سے آغاز کیا، لیکن ریباکینا نے تجربے کا فائدہ اٹھاتے ہوئے اسکور 5-3 کر دیا۔ کینیڈین نوجوان کھلاڑی نے ہمت نہ ہاری اور مسلسل چار گیمز جیت کر پہلا سیٹ 7-5 سے اپنے نام کیا۔دوسرے سیٹ میں ریباکینا نے بھرپور واپسی کی اور شروع میں ہی بریک حاصل کر کے اس سیٹ کو 6-4 سے جیت کر مقابلہ برابر کر دیا۔ریباکینا ایک موقع پر 4-2 سے آگے تھیں، لیکن ممبوکو نے شاندار کم بیک کرتے ہوئے اسکور 4-4 کر دیا۔ دسویں گیم میں چوتھے میچ پوائنٹ پر ممبوکو نے ریباکینا کی غلطی کا فائدہ اٹھایا اور سیمی فائنل کا ٹکٹ کٹا لیا۔ دوسری جانب، سابق فرنچ اوپن چیمپئن ایلینا اوستاپینکو نے اٹلی کی الزابیٹا کوکیاریٹو کو 7-5 اور 6-4 سے ہرا کر چوتھی بار دوحہ اوپن کے سیمی فائنل میں رسائی حاصل کر لی۔ لاطویا سے تعلق رکھنے والی اوستاپینکو کی دوحہ میں یہ 24 ویں جیت ہے، جو اس ٹورنامنٹ کی تاریخ میں کسی بھی کھلاڑی کی سب سے زیادہ فتوحات کا ریکارڈ ہے۔
