کانپور، پوری انسانیت اور ہر زمانے کے انسانوں کے تمام مسائل کا حل قرآن پاک میں اللہ رب العزت نے پہلے سے رکھاہے۔ بطور مسلمان ہماری یہ ذمہ داری ہے کہ ہم ہر دور کے موجودہ مسائل کا حل قرآن کی روشنی میں پیش کریں، لیکن جب ہمارے ہی پاک قرآن پاک پڑھنے کی فرست نہیں تو دوسروں کو کیا پہنچائیں گے۔راعینی مسجد قدوائی نگر میں تراویح میں تکمیل قرآن کے موقع پر منعقدہ دعائیہ تقریب میں بطور مہمان خصوصی تشریف لائے جمعیتہ علماءاتر پردیش کے نائب صدر مولانا امین الحق عبد اللہ قاسمی نے مذکورہ خیالات کا اظہار کرتے ہوئے کہا کہ ماہ رمضان اللہ کا خصوصی مہینہ ہے اور اس مہینہ کا قرآن سے خاص تعلق ہے۔ قرآن ہماری زندگیوں کا رہنما اور اصول ہے۔ قرآن میں ہمارا اور پوری انسانیت کے مسائل کا حل موجودہے۔ ہم آج تکمیل قرآن کے موقع پر رمضان کے مہینہ میں یہ فکر اپنے اندر پیدا کریں کہ ہم قرآن کا پیغام دنیا تک پہنچائیں گے۔ اس پیغام کو دنیا تک پہنچانے کیلئے قرآن کو پڑھیں گے، سمجھیں گے کہ ہمارا رب ہم سے کہہ کیا رہا ہے۔ مولانا نے زور دے کر کہا کہ جس طرح ہم اپنے بچوں کو دین سیکھنے کیلئے مدارس ، مکاتب ،مساجد میں بھیجتے ہیں، ان کیلئے ٹیوشن کا انتظام کرتے ہیں، اسی طرح بڑی عمر کے لوگوں کو بھی دین سیکھنے کی فکر کرنی چاہئے، یہ دین ان کیلئے بھی ہے۔ اس موقع پر مولانا نے دین کے دو حصوں فرض کفایہ اور فرض عین کے بارے میں تفصیل سے واقف کرایا۔ انہوں نے کہا کہ دین کا اتنا علم سیکھنا کہ جس سے ہم صحیح طور پر مسلمان رہ سکیں ، ہر مسلمان کیلئے فرض عین ہے، اس میں مرد، عورت، بچے، بوڑھے، جوان کی تفریق نہیں ۔ دین سیکھنے کیلئے علمائے کرام کے پاس جاکر ان سے وقت لیں اوردین سیکھیں۔ تراویح میں قرآن پاک کا دور مکمل کرنے والے حافظ محمد حطیب کو تمام مصلیان مسجد نے گلپوشی کرکے مبارکباد دی۔ اس موقع پر کثیر تعداد میں مقامی عوام و خواص موجود تھے۔
