نئی دہلی، (یو این آئی) دہلی کیپٹلس کے اسپنر کلدیپ یادو نے انڈین پریمیئر لیگ (آئی پی ایل) کے 56ویں میچ میں شاندار گیند بازی کا مظاہرہ کرتے ہوئے ڈیتھ اوورز میں میچ کا رخ بدل دیا اور اپنی ٹیم کو فتح سے ہمکنار کیا۔
منگل کو ارون جیٹلی اسٹیڈیم میں کھیلے گئے ہائی اسکورنگ میچ میں کلدیپ نے 25 رن پر دو وکٹ لے کر میچ کا رخ ہی بدل دیا اور اپنی ٹیم کو پوائنٹس ٹیبل میں پانچویں مقام پر پہنچا دیا۔ اس شاندار کارکردگی پر انہیں مین آف دی میچ کے خطاب سے نوازا گیا۔
222 رنوں کے تعاقب میں آر آر ٹیم کے پاس 18ویں اوور تک میچ جیتنے کا موقع تھا۔ آر آر کو اس میچ میں 18 گیندوں میں 41 رن درکار تھے۔ اس دوران کپتان نے کلدیپ کو گیند سونپی اور انہوں نے اس اوور میں چار رن کے عوض دو وکٹ لے کر آر آر کی امیدوں پر پانی پھیر دیا۔
میچ کے بعد کلدیپ نے کہا ’’اچھی لینتھ پر گیند کرنا بہت ضروری ہے۔ جب آپ ڈیتھ اوورز میں گیند بازی کرتے ہیں تو یہی ایک چیلنج ہوتا ہے، خاص طور پر جب آپ جانتے ہوں کہ پاور ہٹرز آنے والے ہیں۔ میں نے ڈونوون فریرا کو دیکھا ہے اور میں ان کے خلاف جنوبی افریقہ میں کھیل چکا ہوں۔ میں جانتا تھا کہ وہ بیک فٹ کھلاڑی ہیں، اس لیے میرا منصوبہ صرف انہیں وہاں سے دور رکھنے کی کوشش کرنا تھا اور میں نے انہیں آؤٹ کیا۔ اس کے بعد میں صرف اپنی رفتار اور لینتھ پر توجہ مرکوز کرتا رہا۔
