نئی دہلی (یو این آئی) افغانستان نے متحدہ عرب امارات (یو اے ای) میں جنوبی افریقہ کے ساتھ تین میچوں کی ون ڈے سیریز کے لیے لیگ اسپنر راشد خان کو اپنی 17 رکنی ٹیم میں شامل کیا ہے۔ چیف سلیکٹر احمد شاہ سلیمان خیل نے کہا کہ مارچ میں اپنا ون ڈے ڈیبیو کرنے والے آف اسپنر اے ایم غضنفر کو بھی ٹیم میں جگہ دی گئی۔ راشد خان انجری کے باعث کچھ عرصے سے ٹیم سے باہر تھے اور ان کی صحت یابی کے بعد انہیں ٹیم میں جگہ دی گئی ہے۔تین ایک روزہ میچوں کی سیریز 18 ستمبر سے شروع ہوگی۔ تمام میچز شارجہ میں کھیلے جائیں گے۔ یہ پہلا موقع ہو گا جب دونوں ٹیمیں افغانستان اور جنوبی افریقہ دو طرفہ ون ڈے سیریز میں آمنے سامنے ہوں گی۔ اس سے قبل دونوں ٹیمیں 2019 اور 2023 کے ورلڈ کپ میں مدمقابل ہوئی تھیں۔
