ڈھاکہ، (یواین آئی) بنگلہ دیش کرکٹ بورڈ (بی سی بی ) کی نو منتخب ایڈہاک کمیٹی کے صدر تمیم اقبال نے عہدہ سنبھالتے ہی واضح کر دیا ہے کہ ان کی انتظامیہ کا سب سے اہم مشن ملکی کرکٹ کے مجروح ہونے والے وقار کو بحال کرنا ہے۔بنگلہ دیشی ٹیم کے سابق کپتان تمیم اقبال نے شیرِ بنگلہ نیشنل کرکٹ اسٹیڈیم میں اپنی 11 رکنی کمیٹی کے پہلے بورڈ اجلاس کی صدارت کی۔ یہ اجلاس نیشنل اسپورٹس کونسل کی جانب سے امین الاسلام بلبل کی قیادت میں منتخب بورڈ کو تحلیل کر کے تمیم اقبال کو ایڈہاک کمیٹی کا سربراہ مقرر کیے جانے کے فوری بعد منعقد ہوا۔اجلاس کے بعد میڈیا سے گفتگو کرتے ہوئے تمیم اقبال نے کہا”ہم یہ شدت سے محسوس کرتے ہیں کہ ہمارا پہلا کام بنگلہ دیش کرکٹ کی ساکھ کو بحال کرنا ہے۔ گزشتہ ڈیڑھ سال کے دوران جو نقصان پہنچا ہے، اسے ٹھیک کرنا ہماری اولین ترجیح ہے۔تمیم اقبال نے کمیٹی کو سونپی گئی ذمہ داریوں کے حوالے سے کہا کہ کمیٹی کا بنیادی مقصد تین ماہ کے اندر آزادانہ اور منصفانہ انتخابات کا انعقاد یقینی بنانا ہے۔ تمیم نے یقین دلایا کہ یہ ذمہ داری پوری ایمانداری اور تیزی کے ساتھ نبھائی جائے گی۔ ایک سوال کے جواب میں انہوں نے تصدیق کی کہ ایڈہاک کمیٹی کے ارکان آنے والے انتخابات میں حصہ لینے کے اہل ہوں گے اور وہ اس میں بھرپور شرکت کریں گے۔بنگلہ دیش کرکٹ میں یہ انتظامی تبدیلی ایک ایسے وقت میں آئی ہے جب بورڈ کو اندرونی خلفشار اور نظم و ضبط کے مسائل کا سامنا رہا ہے۔ تمیم اقبال کی قیادت میں اس نئی کمیٹی سے کرکٹ شائقین کو بڑی امیدیں وابستہ ہیں۔
