ریو دی جنیریو، (یواین آئی )برازیلین فٹبال کے عالمی شہرت یافتہ فٹبالر اور ریال میڈرڈ کے سابق اسٹار دفاعی کھلاڑی روبرٹو کارلوس کو صحت کی خرابی کے باعث اسپتال منتقل کیا گیا، جہاں ان کے دل کی کامیاب سرجری کی گئی ہے۔عالمی خبر رساں ادارے کے مطابق 52 سالہ روبرٹو کارلوس ان دنوں چھٹیاں گزارنے کے لیے برازیل میں موجود تھے۔ معمول کے طبی معائنے کے دوران ان میں تشویشناک علامات سامنے آئیں، جس کے بعد انہیں فوری طور پر اسپتال لے جایا گیا۔ابتدا میں وہ ٹانگ میں خون کے ایک معمولی لوتھڑے کی جانچ کے لیے اسپتال پہنچے تھے، تاہم تفصیلی ٹیسٹ اور ایم آر آئی اسکین کے بعد ڈاکٹروں نے دل میں خرابی کی نشاندہی کی۔ طبی ماہرین کے مشورے پر فوری طور پر دل کی سرجری کا فیصلہ کیا گیا، جو کامیابی سے مکمل کر لی گئی۔ڈاکٹروں کے مطابق روبرٹو کارلوس کی حالت اب مستحکم ہے اور وہ خطرے سے باہر ہیں، تاہم احتیاطی تدابیر کے تحت انہیں مزید دو دن تک اسپتال میں زیرِ نگرانی رکھا جائے گا۔واضح رہے کہ روبرٹو کارلوس کا شمار فٹبال کی تاریخ کے جارح مزاج اور بہترین لیفٹ بیکس میں ہوتا ہے۔ انہوں نے اپنی غیر معمولی رفتار، شاندار فری ککس اور یادگار گولز سے دنیا بھر کے شائقین کو متاثر کیا۔انہوں نے برازیل کی قومی ٹیم کی نمائندگی کرتے ہوئے 125 بین الاقوامی میچز کھیلے اور 1998 اور 2002 کے ورلڈ کپ فائنلز میں ٹیم کا حصہ رہے۔ 2002 میں برازیل کو عالمی کپ جتوانے والی ٹیم میں بھی ان کا کردار کلیدی تھا۔کلب فٹبال میں انہوں نے ریال میڈرڈ کے ساتھ تین مرتبہ یوئیفا چیمپئنز لیگ جیتی۔ ریٹائرمنٹ کے بعد بھی وہ ریال میڈرڈ کے سفیر کے طور پر فٹبال سے وابستہ ہیں۔
