ملبورن،(یواین آئی )ٹینس کی دنیا کے سب سے مقبول کھلاڑی اور 20 گرینڈ سلیم خطاب کے مالک روجر فیڈرر ہفتہ کے روز آسٹریلین اوپن میں ایک بار پھر ایکشن میں نظر آئیں گے۔ 44 سالہ سوئس ماسٹر کی واپسی نے دنیا بھر کے ٹینس شائقین میں خوشی کی لہر دوڑا دی ہے۔روجر فیڈرر آسٹریلین اوپن 2026 کی افتتاحی تقریب کے موقع پر ایک خاص نمائشی میچ کا حصہ ہوں گے۔ اس میچ میں ان کے ساتھ ٹینس کی دنیا کے دیگر سابق نمبر ون کھلاڑی بھی نظر آئیں گے۔آنڈرے آگاسی پیٹرک رافٹرلیٹن ہیوٹ یہ میچ ملبورن کے تاریخی روڈ لیور ایرینا میں کھیلا جائے گا، جہاں فیڈرر نے اپنے کیریئر کے کئی یادگار لمحات گزارے ہیں۔واپسی کے حوالے سے گفتگو کرتے ہوئے روجر فیڈرر نے جذباتی انداز میں کہا”ایسا لگتا ہے جیسے ایک پوری زندگی گزر گئی جب میں نے آسٹریلین اوپن کے لیے ‘ہیپی سلیم کی اصطلاح استعمال کی تھی۔ مجھے یہاں گزارا ہوا ہر لمحہ یاد ہے؛ چھ بار ٹرافی اٹھانے کی خوشی، روڈ لیور کے سامنے کھیلنے کا اعزاز اور آسٹریلوی مداحوں کی بے پناہ محبت میرے لیے سب سے قیمتی ہے۔”انہوں نے مزید کہا کہ وہ 2017 اور 2018 کی اپنی مسلسل فتوحات کو کبھی نہیں بھول سکتے اور وہ ایک بار پھر آسٹریلوی شائقین کے ساتھ نئے لمحات تخلیق کرنے کے لیے بے تاب ہیں۔آسٹریلین اوپن کے ڈائریکٹر کریگ ٹائلی نے کہا کہ روجر فیڈرر کو دوبارہ کورٹ پر دیکھنا ایک خواب جیسا ہے، اور انہیں یقین ہے کہ پورے آسٹریلیا سے مداح اپنے ہیرو کو دیکھنے کے لیے جوق در جوق اسٹیڈیم کا رخ کریں گے۔روجر فیڈرر نے اپنا آخری باضابطہ آسٹریلین اوپن میچ 2020 میں نوواک جوکووچ کے خلاف کھیلا تھا اور 2022 میں وہ پیشہ ورانہ ٹینس سے ریٹائر ہو گئے تھے۔ اب تقریباً چار سال بعد وہ ایک بار پھر اسی کورٹ پر اپنا جادو جگائیں گے جہاں انہوں نے تاریخ رقم کی تھی۔
