لاس ویگاس،(یو این آئی ) امریکی باکسر ریان گارسیا نے ہفتے کی شب ایک یکطرفہ مقابلے کے بعد ماریو بیریوس کو شکست دے کر ڈبلیو بی سی ویلٹر ویٹ کا عالمی اعزاز اپنے نام کر لیا۔ 27 سالہ گارسیا نے ججوں کے متفقہ فیصلے کے ذریعے یہ کامیابی حاصل کی۔ریان گارسیا نے مقابلے کے آغاز کے چند سیکنڈز میں ہی بیریوس کو گرا کر اپنی دھاک بٹھا دی۔پورے میچ کے دوران گارسیا نے اپنے بہترین کمبینیشنز اور چابکدستی کے ذریعے کھیل پر قابو پایا۔ججوں نے گارسیا کے حق میں 119-108، 120-107 اور 118-109 کا اسکور دیا، جو ان کی برتری کا واضح ثبوت تھا۔عالمی چیمپئن بننے کے بعد ریان گارسیا (جن کا ریکارڈ اب 25-2 ہے) نے جذباتی انداز میں کہا”آخر کار ورلڈ چیمپئن بن کر بہت اچھا لگ رہا ہے۔ یہ وہ خواب ہے جو میں سات سال کی عمر سے دیکھ رہا تھا۔اس بڑی جیت کے فوراً بعد گارسیا نے اپنے اگلے ہدف کی نشاندہی کر دی ہے۔ انہوں نے ڈبلیو بی او سپر لائٹ ویٹ چیمپئن شیکور اسٹیونسن کو چیلنج کرتے ہوئے کہا کہ وہ اب ان کا مقابلہ کرنا چاہتے ہیں۔دوسری جانب ماریو بیریوس (ریکارڈ 29-3-2) کے لیے یہ ایک اور مایوس کن رات تھی، جو اس سے قبل جولائی میں مینی پاکیاؤ کے خلاف بمشکل ڈرا کرنے میں کامیاب رہے تھے۔
