فلوریڈا، (یو این آئی) انڈین ویلز میں آمد سے قبل آریانا سبالینکا، ایلینا رائبا کینا سے مسلسل دو بڑے فائنلز ہار چکی تھیں، لیکن جمعرات کی رات 1 گھنٹے 19 منٹ میں 3-6، 4-6 سے فتح حاصل کرنے کے بعد انہوں نے ایک بار پھر اس مقابلے کا رخ اپنے حق میں موڑ دیا ہے اور باوقار ‘سن شائن ڈبل سے اب وہ محض ایک جیت دور ہیں۔ڈبلیو ٹی اے ٹور میں ان دونوں کے درمیان ہونے والے 17 میچوں میں یہ سبالینکا کی 10ویں جیت ہے، جو انہیں میامی میں مسلسل دوسرے فائنل میں لے آئی ہے، جہاں ان کی ایک اور جانی پہچانی حریف کوکو گوف ان کا انتظار کر رہی ہیں۔ ان دونوں کے درمیان اب تک ہونے والے مقابلوں میں سبالینکا اور گوف 6-6 کی جیت کے ساتھ برابری پر ہیں۔سبالینکا نے اپنے آن کورٹ انٹرویو میں کہا، ’’مجھے ہماری اس رقابت میں واقعی بہت لطف آتا ہے۔ وہ ایک شاندار کھلاڑی ہیں جو ہمیشہ مجھے اپنی مکمل صلاحیت کے ساتھ کھیلنے پر مجبور کرتی ہیں، اور آپ جانتے ہیں کہ ان کے خلاف کھیلتے ہوئے آپ کو ہر حال میں اپنی بہترین کارکردگی دکھانی پڑتی ہے۔‘‘سبالینکا نے کہا،’’میرا خیال ہے کہ میں نے تقریباً سب کچھ درست انداز میں کیا، اور اس نے بھی شاندار کھیل پیش کیا، لیکن میں سمجھتی ہوں کہ میں نے اس پر خاصا دباؤ برقرار رکھا اور اس فتح پر مجھے فخر ہے۔ یہ مقابلہ جسمانی اور ذہنی دونوں اعتبار سے ہمیشہ مشکل ہوتا ہے، اور اس کے خلاف ایک اور جیت حاصل کر کے مجھے خوشی ہو رہی ہے۔‘‘اتفاق سے سبالینکا 2023 اور 2024 میں ریباکینا کے بعد مسلسل میامی اوپن کے فائنل میں پہنچنے والی پہلی کھلاڑی بن گئی ہیں، جبکہ 2013 سے 2015 کے دوران سرینا ولیمز کے بعد عالمی نمبر ایک کی حیثیت سے ایسا کارنامہ انجام دینے والی بھی پہلی کھلاڑی ہیں۔اگر وہ ایک قدم اور آگے بڑھ کر اس ایونٹ میں مسلسل دوسرا خطاب جیتنا چاہتی ہیں، اور ساتھ ہی 2022 میں ایگا سویاتیک کے بعد ’سن شائن ڈبل‘ مکمل کرنے والی پہلی کھلاڑی بننا چاہتی ہیں، تو سبالینکا کو وہی کارکردگی دہرانا ہوگی جو انہوں نے ریباکینا کے خلاف دکھائی تھی—یعنی ایک سنسنی خیز مقابلے کو فیصلہ کن فتح میں بدلنا۔ اس ہفتے سبالینکا کے لیے یہ انداز معمول بنتا جا رہا ہے۔ وہ بغیر کوئی سیٹ گنوائے فائنل تک پہنچی ہیں، اور جمعرات کو کسی بھی مرحلے پر وہ دباؤ میں نظر نہیں آئیں۔ انہوں نے اپنے ابتدائی سروس گیمز بآسانی جیتے، جبکہ ریباکینا کو اپنی سروس برقرار رکھنے کے لیے سخت جدوجہد کرنا پڑی۔موجودہ چیمپئن کی کارکردگی ہر لحاظ سے مکمل تھی۔ انہوں نے مؤثر سروس کرتے ہوئے نو ’ایس‘ لگائے اور پہلی سروس پر 83 فیصد پوائنٹس اپنے نام کیے؛ عمدہ ریٹرنز کے ذریعے ریباکینا کی طاقتور سروس کے خلاف آٹھ بریک پوائنٹس حاصل کیے، جن میں سے چار کو کامیابی میں بدلا؛ اور خاص طور پر اپنے فورہینڈ سے نہایت صاف اور مؤثر شاٹس کھیلے۔ اس نتیجے کے ساتھ انہوں نے اس سیزن کی اپنی 21ویں فتح درج کی جو ٹور میں سب سے زیادہ ہے اور ریباکینا پر سبقت حاصل کر لی۔سبالینکا اس صدی کی چوتھی کھلاڑی ہیں جو ایک ہی سیزن کے ابتدائی چار ڈبلیو ٹی اے ایونٹس کے فائنلز تک پہنچی ہیں؛ اس سے قبل مارٹینا ہنگس (2001)، سرینا ولیمز (2003) اور وکٹوریا آزارینکا (2012) یہ کارنامہ انجام دے چکی ہیں۔کوکو گاف کے خلاف ممکنہ فتح انہیں اس سیزن کا تیسرا خطاب دلا سکتی ہے؛ اس سے قبل وہ برسبین اور انڈین ویلز میں کامیابی حاصل کر چکی ہیں۔ وہ فائنل میں مکمل تیاری کے ساتھ اتریں گی اور جانتی ہیں کہ فلوریڈا کی اس کھلاڑی کے خلاف انہیں کس نوعیت کے چیلنج کا سامنا ہوگا۔
