سید پرویز قیصر
رانچی میں کھیلے گئے وجے ہزارے ٹرافی کے میچ میں اروناچل پردیش کے خلاف بہار کے بلے بازوں نے شاندار بلے بازی کا مظاہرہ کرتے ہوئے مقررہ50 اوور میں574 رن بنائے جس میں انکے کپتان شاقب الغنی40 بالوں پر 10 چوکوں اور12 چھکوں کی مدد سے128 رن بناکر ناٹ آوٹ رہے۔انہوں نے اپنی سنچری32بالوں پر اسکور کی جوایک روزہ کرکٹ میں کسی ہندوستانی کی سب سے تیز سنچری ہے۔
ایک روزہ کرکٹ میںیہ تیسری سب سے تیز سنچری بھی ہے۔ اس قسم کے کرکٹ میں سب سے تیز سنچری بنانے کا اعزاز آسڑیلیا سے تعلق رکھنے والے جیک فریسر میک گورک کے پاس ہے جنہوں نے جنوبی آسڑیلیا کی جانب سے کھیلتے ہوئے تسمانیہ کے خلاف ایڈیلیڈ میں8 اکتوبر2023 کو ہوئے میچ میں29 بالوں پر سنچری مکمل کی تھی۔ وہ اس اننگ میں51 منٹ میں38 بالوں پر10 چوکوں اور13 چھکوں کی مدد سے125 رن بنانے میں کامیاب رہے تھے۔
جنوبی افریقہ کے ابراہم ڈی ویلرس نے ویسٹ انڈیز کے خلاف جوہانسبرگ میں18 جنوری2015 کوہوئے میچ میں59 منٹ میں44 بالوںپرنو چوکوں اور16 چھکوں کی مدد سے149 رن بنائے تھے جس میں انہوں نے اپنی سنچری31 بالوں پر مکمل کی تھی۔انکی یہ سنچری ایک روزہ بین الاقوامی کرکٹ میں سب سے تیز اور ایک روزہ کرکٹ میں دوسری سب سے تیز سنچری ہے۔
شاقب الغنی کی 32بالوں پر اسکور کی گئی سنچری کے فورا بعد جھار کھنڈ کی جانب سے کھیلتے ہوئے کرناٹک کے خلاف بنگلور میں ایشان کشن33 بالوں پر اپنی سنچری مکمل کرنے میں کامیاب رہے جو ایک روزہ کرکٹ میں کسی ہندوستان کی دوسری سب سے تیز اور کل ملاکر چوتھی سب سے تیز سنچری تھی۔ اس اننگ میں وہ39 بالوں پر سات چوکوں اور14 چھکوں کی مدد سے125 رن بنانے میں کامیاب رہے تھے۔ انکی اس سنچری کی بدولت جھارکھنڈ نے مقررہ50 اوور میںنو وکٹ پر 412 رن بنائے تھے۔ کرناٹک کیلئے یہ اسکور بڑا ثابت نہیں ہوا اوراس نے47.3 اوور میں پانچ وکٹ پر 413 رن بناکر میچ پانچ وکٹ سے جیت لیا تھا۔
اس سیزن سے پہلے جس ہندوستانی کو ایک روزہ کرکٹ میں سب سے تیز سنچری بنانے کا اعزاز حاصل تھا وہ پنجاب کے انمول پریت سنگھ تھے ۔ دائیں ہاتھ کے اس بلے باز نے اروناچل پردیش کے خلاف احمدآباد میں21 دسمبر2024 کوہوئے میچ میں45بالوں پر12 چوکوں اور نو چھکوں کی مدد سے آوٹ ہوئے بغیر115 رن بنائے تھے۔ انہوں نے اپنی سنچری35 بالوںپر مکمل کی تھی جو کسی ہندوستانی کی تیسری سب سے تیز اور کل ملاکر پانچویں سب سے تیز سنچری ہے۔
رانچی میں بہار کے وبھو سوریہ ونشی نے 84بالوں پر16 چوکوں اور15 چھکوں کی مدد سے 190 رن بنانے میں کامیاب رہے ۔ انہوں نے اپنی سنچری36 بالوں پر مکمل کی جو کسی ہندوستانی کی ایک روزہ کرکٹ میںچوتھی سب سے تیز اورکل ملاکر آٹھویں سب سے تیز سنچری تھی۔
بڑودہ کیلئے کھیلتے ہوئے مہا راشٹر کے خلاف احمد آباد میں16 فروری2010 کو ہوئے میچ میںیوسف پٹھان نے63 منٹ میں42 بالوںپر آٹھ چوکوں اور دس چھکوں کی مدد سے آوٹ ہوئے بغیر 108 رن بنائے تھے۔ انہوں نے اپنی سنچری40 بالوں پر مکمل کی تھی کو کسی ہندوستانی کی ایک روزہ کرکٹ میں اب پانچویں سب سے تیز سنچری ہے۔
