کابل:افغانستان میں سعودی عرب کے سفارتخانے نے اعلان کیا ہے کہ ’کابل میں مملکت کے سفارتی مشن نے اتوار 22 دسمبر سے دوبارہ کام شروع کردیا۔‘سفارتخانے کے آفیشل ایکس اکاونٹ پر بیان میں کہا گیا کہ’ افغان عوام کو تمام خدمات فراہم کی جائیں گی، یہ فیصلہ سعودی حکومت کی خواہش کے مطابق ہے۔‘اس سے قبل افغان وزیر خارجہ امیر خان متقی نے سعودی سفیر سے ملاقات میں مملکت کے ساتھ افغانستان کے مشترکہ ثقافتی، تاریخی اور مذہبی تعلقات کو اجاگر کرتے ہوئے ریاض کے ساتھ تعلقات کے فروغ میں دلچسپی کا اظہار کیا تھا۔ملاقات میں سعودی سفیر نے مختلف شعبوں میں انسانی امداد اور تعاون جاری رکھنے کا عزم ظاہر کیا۔یاد رہے کہ اگست2021 میں سعودی عرب نے افغانستان کے غیر مستحکم حالات کے پیش نظر وہاں سے اپنے سفارتی مشن کے ارکان کو واپس بلالیا تھا۔اس وقت وزارت خارجہ نے کابل میں سفارتخانے کے تمام سفارتی عملے کے انخلا کی تصدیق کرتے ہوئے کہا تھا کہ تمام سفارتکار سعودی عرب پہنچ گئے ہیں اور سب خیر وعافیت سے ہیں۔
