ریاض(ہ س)۔ریاض میں سعودی کابینہ کا اجلاس ولی عہد شہزادہ محمد بن سلمان بن عبدالعزیز کے زیر صدارت منعقد ہوا۔ اجلاس میں اسرائیل کی جانب سے انتہا پسندانہ اور اشتعال انگیز بیانات اور دنیا بھر کے مسلمانوں کے جذبات مسلسل مجروح کرنے کی شدید مذمت کی گئی۔ کابینہ نے عالمی برادری سے مطالبہ کیا ہے کہ برادر فلسطینی عوام کو درپیش انسانی مسائل کا سلسلہ روکا جائے۔ مزید یہ کہ بین الاقوامی قوانین اور قرار دادوں کی مسلسل خلاف ورزی کرنے والے اسرائیلی ذمے داران کو جواب دہ ٹھہرانے کے لیے سنجیدہ طریقہ کار اختیار کیا جائے۔ اجلاس کے آغاز پر کابینہ نے وینزویلا کے صدر کی جانب سے سعودی فرماں روا کو موصول ہونے والے خط اور سعودی ولی عہد کی فلسطینی صدر سے ملاقات کا جائزہ لیا گیا۔اجلاس کے بعد سعودی وزیر اطلاعات سلمان الدوسری نے سرکاری خبر رساں ایجنسی SPA کو دیے گئے بیان میں واضح کیا کہ کابینہ نے سوئٹزرلینڈ میں منعقد ہونے والی ملاقاتوں کے نتائج پر غور کیا۔ ان کا مقصد سوڈانی عوام کے مسائل میں کمی کے لیے نمایاں اور فوری اقدامات کرنا اور جارحیت پر مبنی کارروائیوں کے مستقل خاتمے کو یقینی بنانا ہے۔ کابینہ نے باور کرایا کہ سعودی عرب برادر ملک سوڈان میں امن و استحکام کی واپسی کے لیے عالمی برادری میں اپنے شراکت داروں کے ساتھ کام کرتا رہے گا۔کابینہ نے حفظ قرآن اور تلاوت سے متعلق 44 ویں شاہ عبدالعزیز بین الاقوامی مقابلے میں کامیابی حاصل کرنے والوں کو مبارک باد پیش کی۔علاوہ ازیں کابینہ نے مملکت میں ای اسپورٹس کے پہلے عالمی کپ کے کامیابی کے ساتھ انعقاد کو بھی سراہا۔
