لاہور، (یواین آئی) لاہور قلندرز کے ڈائریکٹر ثمین رانا نے کہا ہے کہ شاہین شاہ آفریدی اور سکندر رضا نے سیکیورٹی پروٹوکول کی کوئی جان بوجھ کر خلاف ورزی نہیں کی۔پاکستانی میڈیا رپورٹ کے مطابق ثمین رانا نے کہا کہ ہوٹل میں پیش آنے والا واقعہ درست انداز میں رپورٹ نہیں ہوا، ٹیم ہمیشہ سیکیورٹی پروٹوکولز کا خیال رکھتی ہے اور انہی اقدامات کی بدولت میچز کا انعقاد ممکن ہو رہا ہے۔انہوں نے کہا کہ شاہین شاہ آفریدی نے نہ تو کسی کی اتھارٹی کو چیلنج کیا اور نہ ہی زبردستی کسی کو اندر داخل کروایا۔ثمین رانا کا کہنا تھا کہ ٹیم مینجمنٹ نے کپتان پر جرمانہ عائد کر کے ایک مثال قائم کی اور واضح پیغام دیا ہے کہ نظم و ضبط پر کوئی سمجھوتہ نہیں ہوگا۔انہوں نے مزید کہا کہ ٹیم ایک یونٹ کے طور پر کام کر رہی ہے اور ایسے تنازعات کھیل کا حصہ ہوتے ہیں، تاہم ان پر کارروائی بھی جاری رہتی ہے۔ٹیم کی کارکردگی پر بات کرتے ہوئے انہوں نے کہا کہ پہلا میچ جیتنے سے اعتماد ملا جبکہ دوسرے میچ میں ٹیم نے بھرپور مقابلہ کیا، اگرچہ اسکور کم رہا، تاہم ٹیم سے بڑی توقعات وابستہ ہیں۔انہوں نے کہا کہ لاہور قلندرز ایک متحد فیملی ہے اور تمام چیلنجز کا مل کر سامنا کرے گی، امید ہے کہ ٹیم کی کارکردگی میں تسلسل برقرار رہے گا۔بال ٹیمپرنگ کے معاملے پر ثمین رانا نے کہا کہ میچ آفیشلز اپنا کام کر رہے ہیں اور جو بھی فیصلہ آئے گا لاہور قلندرز اس کا احترام کرے گی۔انہوں نے مزید کہا کہ لاہور قلندرز واحد فرنچائز ہے جس کا کسی کرکٹ بورڈ کے ساتھ باقاعدہ معاہدہ ہے، زمبابوے کے ساتھ 10 سالہ معاہدے کے تحت وہاں کے کھلاڑی یہاں تربیت حاصل کر رہے ہیں۔
