چنئی (یو این آئی) ہندوستانی خاتون کرکٹ ٹیم کی اوپنر بلے باز شیفالی ورما نے جمعہ کو جنوبی افریقہ کے خلاف کھیلے جا رہے پہلے ٹیسٹ میچ کے پہلے دن ریکارڈ توڑ اننگز کھیلتے ہوئے اپنی پہلی سنچری بنا ئی اور پھر اسے ڈبل سنچری میں تبدیل کر دیا۔وہ 22 سال بعد یہ کارنامہ انجام دینے والی دوسری ہندوستانی خاتون کرکٹر ہیں۔ اس سے قبل سال 2002 میں سابق ہندوستانی کپتان متھالی راج نے انگلینڈ کے خلاف ڈبل سنچری اسکور کی تھی اور 214 رن بنائے تھے۔ شیفالی نے اپنے پانچ ٹیسٹ میچوں میں یہ کارنامہ انجام دیا ہے۔ انہوں نے اپنی ڈبل سنچری 194 گیندوں میں مکمل کی۔ اس دوران انہوں نے آٹھ چھکے اور 22 چوکے لگائے۔ اس کے ساتھ ہی شیفالی تیز ترین ڈبل سنچری بنانے والی پہلی ہندوستانی خاتون کرکٹر بن گئی ہیں۔اس کے علاوہ اسمرتی مندھانا نے بھی شاندار بلے بازی کی اور 149 رن بنائے۔ میچ کے دوران شیفالی ورما اور اسمرتی مندھانا نے پہلے وکٹ کے لیے 292 رن کی ریکارڈ شراکت قائم کی۔ شیفالی اور مندھانا نے ٹیسٹ کرکٹ میں پہلے وکٹ کے لیے سب سے زیادہ شراکت داری کا پاکستان کا 20 سال پرانا ریکارڈ توڑ دیا ہے۔ شیفالی نے 197 گیندوں کا سامنا کیا اور اپنی 205 رن کی اننگز میں 23 چوکے اور آٹھ چھکے لگائے۔
