ناظم بیگ
بلند شہر ؍سماج نیوز سروس:ہندی دیوس کے موقع پرشبھم انسٹی ٹیوٹ آف لٹریچر ،آرٹ اینڈ کلچر کے 33 ویں یوم تاسیس کے موقع پر ایک شاندار تقریب میں مشہور شاعر ڈاکٹر شمیم رانا کو مرحوم ڈاکٹرسراج قریشی کی یاد میں پہلے غزل گورو سمان سے نوازا گیا۔ پروگرام میں شبھم رتن ، شبھم شری کے خطابات دیگر ادیبوں کو پیش کیے گئے اور تین کتب کا اجراء بھی کیا گیا۔ وا ضح رہے کہ گلائو ٹھی واقع پرشو رام دھرم شالہ میں ہندی دیوس کے مو قع پر ایک شاندار تقریب میں شبھم تنظیم نے تعلیمی ،سماجی اور ادبی خدمات انجام دینے والی ہستیوں کو مختلف اعزازات سے نوازا۔ تقریب میں غزل کے معروف شاعر ڈاکٹر شمیم رانا کو ان کی ادبی خدمات کے اعتراف میں انہیں شال اوڑھا کر مومنٹو پیش کیا اور غزل گورو خطاب سے نوازا۔ ڈاکٹر شمیم رانا نے منتظمین کا شکریہ ادا کرتے ہوئے ہندی دیوس کے موقع پر ہم وطنوں کو نیک خواہشات کا اظہار کیا۔شبھم تنظیم کے صدر ڈاکٹر دیوکی نندن شرما، سکریٹری ڈاکٹر ریکھا جندال، خزانچی للت کمار شرما، مرحوم ڈاکٹر سراج الدین قریشی کے صاحبزادے سہیل سراج احمد اور دیگر معزز مہمانان نے ڈاکٹر سراج قریشی (مرحوم) کو خراج عقیدت پیش کرتے ہوئے انکی یاد میں پہلے ’’غزل گورو سمان‘‘سے مشہور شاعر ڈاکٹر شمیم رانا کو سرفراز کیا۔اس سے قبل شبھم رتن ایوارڈ لکھنؤ کے مشہور ادیب اروند کمار ودیہی کو دیا گیا، شبھم شری ایوارڈ بلند شہر کی ہندی کی شاعرہ مدھو وارشنے کو، آنجہانی ششی بھوشن متل کی یاد میں کویتا گورو ایوارڈ خورجہ کے کوی پریم کمار شرما کو دیا گیا۔ اس کے بعد آنجہانی نہر سنگھ کی یاد میں غازی آباد کی کہانی کار ڈاکٹر ٹنکل شرما کو ’کہانی گورو‘ خطاب سے نوازا گیا۔پروگرام کے آخری مرحلے میں ڈاکٹر دیوکی نندن شرما اور ڈاکٹر ایشور سنگھ کی کتاب ’انٹرنیٹ کا دور اور کتابیں ڈاکٹر دیوکی نندن شرما اور مکیش نروکار کی کتاب ’اپنی مٹی اپنی کویتا‘ اورڈاکٹر ایشور سنگھ کی کتاب ’سوال سروکاروں کے‘ کی رونمائی ہوئی۔ پروگرام کی صدارت این آر ای سی کالج خورجہ کے سابق پرنسپل پروفیسر کیشودیو شرما نے کی۔ مہمان خصوصی ارون شکون غازی آبادی تھے۔ آخر میں شبھم تنظیم کے عہدیداروں نے مہمانوں اور موجود لوگوں کا شکریہ ادا کیا ۔اس موقع پر ڈاکٹر سہیل احمد قریشی ،ڈاکٹر گلزار دہپہ، شاعر وصحافی، اردو ٹیچر مقصود جالب، ڈاکٹر ایشور سنگھ ، صحافی سید اکرام وغیرہ خاص طور پر موجود تھے۔
