ناگپور، پریس ریلیز،ہمارا سماج: الیکشن کمیشن آف انڈیا کی جانب سے شروع کی گئی ایس آئی آر یعنی ووٹر لسٹ کی خصوصی نظرِ ثانی کا عمل اب مہاراشٹر میں بھی شروع ہو چکا ہے۔ اس سے قبل ملک کی بارہ ریاستوں میں یہ عمل مکمل کیا جا چکا ہے۔ اسی پس منظر میں عوام کی رہنمائی اور بیداری کے مقصد سے جماعتِ اسلامی ہند مہاراشٹر کی جانب سے ایس آئی آرہیلپ ڈیسک سینٹر قائم کیا گیا، جس کا افتتاح امیرِحلقہ جماعتِ اسلامی ہند مہاراشٹر کے ہاتھوں عمل میں آیا۔اس موقع پر مقررین نے کہا کہ ووٹر لسٹ کی یہ نظرِ ثانی جمہوری عمل کا ایک اہم مرحلہ ہے اور ہر شہری کے لیے ضروری ہے کہ وہ اپنے ووٹ کے حق کے تحفظ کے لیے بیدار اور متحرک رہے۔ انہوں نے بتایا کہ اب تک ملک کی بارہ ریاستوں میں کروڑ وں افراد کے نام ووٹر لسٹ سے حذف کیے جا چکے ہیں، اس لیے معمولی سی غفلت بھی سنگین نتائج کا سبب بن سکتی ہے۔عوام کو ہدایت دی گئی کہ سب سے پہلے اپنے بی ایل او(بوتھ لیول آفیسر) کے ذریعے 2002 کی ووٹر لسٹ اور 2025 کی ووٹر لسٹ کی میپنگ (آپس میں جوڑنے) کا عمل مکمل کروائیں۔ ماہرین کے مطابق اگر یہ میپنگ مکمل ہو جاتی ہے تو تقریباً 60 فیصد کام خود بخود مکمل ہو جاتا ہے۔ اس مرحلے میں کسی قسم کے دستاویزات کی ضرورت نہیں ہوتی۔اس کے ساتھ ہی عوام سے یہ بھی اپیل کی گئی کہ وہ 2025 کی ووٹر لسٹ میں اپنا اور اپنے اہلِ خانہ کا نام لازماً چیک کریں۔ اگر کسی کا نام موجود نہ ہو تو فوری طور پر فارم نمبر 6 بھر کر نیا ووٹر کارڈ بنوائیں۔ اسی طرح اگر نام، عمر یا پتہ میں کوئی غلطی ہو تو فارم نمبر 8 کے ذریعے درستگی کروائیں۔ فارم جمع کرانے کے بعد اس کی رسید اپنے پاس محفوظ رکھنا بھی ضروری ہے۔اِس موقع پر امیر حلقہ مولانا الیاس خان فلاحی نے کہا کہ ووٹر لسٹ سے نام حذف ہو جانا دراصل ایک شہری کو اس کے بنیادی جمہوری حق سے محروم کر دینا ہے۔ اس لیے تمام شہریوں سے اپیل کی گئی کہ وہ تاخیر نہ کریں، اپنے بی ایل او سے رابطہ کریں اور ایس آئی آر میپنگ کا عمل مکمل کروائیں۔آپ نے مزید کہا کہ عوام کی سہولت کے لیے قائم کیے گئے ایس آئی آر آن لائن ہیلپ ڈیسک سینٹر میں مختلف امور میں رہنمائی فراہم کی جا رہی ہے، جن میں ایس آئی آر میپنگ کا طریقہ، اپنے بی ایل اوکی معلومات حاصل کرنا، 2002 / 2003 کی ووٹر لسٹ میں نام تلاش کرنا، ضروری دستاویزات کے بارے میں معلومات اور ووٹر لسٹ میں نام شامل کرنے، درستگی کروانے یا حذف کرنے کا طریقہ شامل ہے۔
