مظفرپور – احاطۂ جامعہ فاطمہ للبنات قیصر حلیم پکی سرائے چندوارہ مظفرپور میں سولہویں مجلس ختم بخاری و ردائے عالمیت و فضیلت اور انیسواں سالانہ انعامی جلسہ نہایت عقیدت، روحانیت اور علمی وقار کے ساتھ منعقد ہوا، جو کامیابی کے ساتھ اختتام پذیر ہوا۔جلسے کا باضابطہ آغازجامعہ ایک طالبہ کی پرسوز تلاوتِ کلام پاک سے ہوا، جس کے بعد نعت رسول مقبول ﷺ پیش کی گئی، اس موقع پر جامعہ کی طالبات نے مکالمات، حمد و نعت اور تقاریر پیش کر کے اپنی علمی و ادبی صلاحیتوں کا شاندار مظاہرہ کیا، جسے حاضرین نے بے حد سراہا۔جلسے کی صدارت شہر بنگلور کے معروف معالج اور ڈاکٹروحکیم مولانا سید افضل حسین صاحب قاسمی (مالک نو رنگ دواخانہ، بنگلور و رکن شوریٰ مدرسہ مظاہر علوم وقف سہارنپور) نے فرمائی، اپنے صدارتی خطاب میں انہوں نے بچیوں کی دینی و عصری تعلیم کی اہمیت، اس کے سماجی و اخلاقی فوائد اور ایک صالح معاشرے کی تشکیل میں خواتین کے کردار پر تفصیلی روشنی ڈالی۔اس موقع پر ملک کے ممتاز عالم دین حضرت مولانا بدیع الزماں صاحب ندوی قاسمی (چیئرمین انڈین کونسل آف فتویٰ اینڈ ریسرچ ٹرسٹ، بنگلور کرناٹک و مہتمم جامعہ فاطمہ للبنات مظفرپور) نے الجامع الصحیح للبخاری کے آخری باب کی آخری حدیث کا سبق دیا، آپ نے حدیث کی شرح کے ساتھ امام بخاریؒ کی حیات طیبہ، ان کی علمی خدمات اور امت کے لیے ان کے گرانقدر کارناموں پر سیر حاصل گفتگو فرمائی، جس سے محفل علمی و روحانی نور سے منور ہو گئی۔اس موقع پر مہتمم مدرسہ جامع العلوم مظفرپورمولانا آل حسن قاسمی ، صدر ادارہ دعوۃ السنہ مہاراشٹرا ممبئی مولانامحمد شاہد ناصری حنفی، قاضی دارالقضاء ندوۃ العلماء لکھنؤ مولانا قاضی محمد مستقیم ندوی، مہتمم مدرسہ اسلامیہ احسانیہ گوپال گنج مولانا محمد حامد ندوی ، نیابھوج پور بکسرسے ملی وسماجی رہنمامولانا احمد کریم قاسمی عرف نیتاجی امام وخطیب جامع مسجد بکھری چوک مولانا محمد خورشید عالم قاسمی ، قاضی دارالقضاء امارت شرعیہ مظفرپورمولانا مفتی محمد قیصر علی قاسمی نے بھی اپنے زریں اور قیمتی خیالات کا اظہارکیا ۔اسی طرح اسٹیج پرتشریف فرمامہمانان خصوصی میں بنگلورسےانجینئرحافظ وحید الزماں ڈائریکٹر وژڈم انٹرنیشنل پبلک اسکول نرولی ، مظفرپور، جامعہ کے مشیر خصوصی انجینئر سُعید اختر ،ٹرسٹ کے خازن جناب محمد نظیر عالم ، بکھری ، باج پٹی ، ناظرعام جامعہ مولانا مسیح الزماں ندوی بنگلور/ مظفرپور ، آواپور، سیتامڑھی سے جناب منصور عالم صاحب بھی تھے ۔آخر میں حضرت مولانا بدیع الزماں صاحب ندوی قاسمی کی پراثر دعا پر مجلس کا اختتام عمل میں آیا، جلسے میں موجود سامعین و ناظرین نے جامعہ فاطمہ للبنات کی طالبات کی بہترین کارکردگی، نظم و ضبط اور علمی استعداد کی دل کھول کر تعریف کی اور ادارے کے لیے نیک خواہشات اور دعاؤں سے نوازا، اس موقع پر معزز علماء کرام، سرکردہ شخصیات، سرپرست حضرات، والدین اور بڑی تعداد میں اہلِ علاقہ شریک رہے، جلسے کے اختتام پرناظمِ تعلیمات جامعہ مولانا ظفیرعالم قاسمی نے تشریف لائے ہوئے تمام معزز مہمانوں، علماء کرام اور سامعین کا تہ دل سے شکریہ ادا کیااور ناظم شعبۂ تعمیر وترقی جامعہ مولانا عبدالصمد مظاہری نے آئے ہوئے مہمانوں کا پرتپاک استقبال کیا ۔
