راہل گاندھی کی آرتی کرتے الٹی تصویر شیئرکرنے پر کانگریس نے لی کلاس، شیوسینا نے کہا’’ مذہبی رسوم کا مذاق نہیں اڑایاجانا چاہئے‘‘
عامر سلیم خان
نئی دہلی، سماج نیوز سروس: مذہب کاٹھیکہ بھارتیہ جنتا پارٹی نے لے رکھاہے۔ اس کااندازہ یوں ہوتا ہے کہ جب بھی کسی دوسری پارٹی اور خاص طو رپر کانگریس کے لیڈرس پوجا پاٹ اور مذہبی رسوم ادا کرتے ہیں تو بھارتیہ جنتا پارٹی کی نظروں کا کانٹا بن جاتے ہیں۔ یہی کچھ ہوا جب مرکزی وزیر اسمرتی ایرانی نے راہل گاندھی کی تصویر الٹی شیئر کرڈالی اوروہ تصویر جب وہ مدھیہ پردیش کے اومکاریشور میں ماں نرمدا کی آرتی کررہے تھے۔اس کے بعد کانگریس کے ساتھ ساتھ شیو سینا نے بھی اسمرتی ایرانی کی جم کر کلاس لگائی ۔یہ پہلی بار نہیں ہواہے جب کانگریس لیڈر کے مذہبی رسوم کی ادائیگی کا مذاق اڑایا گیا ہے۔ بیشتر اوقات یہی کچھ ہوتارہا ہے کیونکہ بی جے پی کو لگتا ہے کہ مذہب کا ٹھیکہ تو اس کے پاس ہے۔ کہا جاتا ہے کہ کانگریس کی’ بھارت جوڑو یاترا‘چونکہ عوام میں کافی مقبول ہورہی ہے اس لئے بھی بی جے پی کو یاترا ایک آنکھ نہیں بھارہی ہے۔ایسے میں بی جے پی کانگریس لیڈروں کی پوجا پر خوب مذاق اڑاتی ہے۔
راہل گاندھی نے کل آرتی کرتے ہوئے اپنی ایک تصویر ٹویٹر پرشیئر کی اور لکھا’’ آج، بارہ جیوترلنگوں میں سے ایک لارڈ اومکاریشور مندر میں نرمدا آرتی کے ساتھ پوجا کرنے کا شرف حاصل ہوا‘‘۔ مشہور شیو مندر کے پجاریوں نے راہل گاندھی کے سر پر پگڑی رکھی اور کندھوں پر اوم لکھا ہوا اسکارف لپیٹا۔ خواتین اور بچوں کی ترقی کی وزیر اسمرتی ایرانی نے تصویر کو الٹا شیئر کرتے ہوئے لکھا ’’اب یہ ٹھیک ہے۔‘‘ اس کے بعد شیوسینا لیڈر چترویدی نے ایرانی پر الزام لگایا کہ وہ آسام کے وزیر اعلیٰ ہمنتا بسوا سرما کو پیچھے چھوڑنے کی کوشش میں ہندو رسم و رواج کا مذاق اڑارہی ہیں‘‘۔پرینکا چترویدی نے ٹویٹ کیاکہ آسام کے سی ایم سے آگے بڑھنا چاہتی ہیں کیونکہ ٹرول ٹیارا چھین لیا جا رہا ہے، لہٰذا ٹائٹل اورٹیاراکو برقرار رکھنے کیلئے ٹرول کرنے کی کوشش میں ہندو رسومات کا مذاق اڑایا جا رہا ہے۔بتادیں کہ آسام کے وزیر اعلیٰ نے ابھی حالیہ دنوں ایک بیان میں راہل گاندھی کی داڑھی والی شکل کا موازنہ صدام حسین سے کیا تھا۔
اس ساری پیشرفت پر کانگریس کی ترجمان لاونیا بلال نے ایک ٹویٹ میں کہا کہ وزیر کے ذریعہ ’’راہل گاندھی کیلئے جنون اور نفرت مضحکہ خیز بلندیوں پر پہنچ گئی ہے۔ قابل ذکر ہے کہ راہل گاندھی کی قیادت میں’بھارت جوڑو یاترا‘ جمعہ کو مدھیہ پردیش کے کھنڈوا ضلع پہنچی۔ کانگریس سابق سربراہ نے اپنی بہن اور پارٹی جنرل سکریٹری پرینکا گاندھی اور ان کے خاندان کے ارکان کے ساتھ اومکاریشور میںما نرمداکی آرتی کی تھی۔گاندھی بہن بھائیوں نے نرمدا ندی کے کنارے برہم پوری گھاٹ پر پجاریوں کے ساتھ آرتی کرتے ہوئے ایک چراغ رکھا۔ راہل گاندھی نے دریا پر چونری بھی چڑھائی اور پھر ملک کے 12 جیوترلنگوں میں سے ایک مشہور شیو مندر میں پوجا کی۔قابل ذکر بات یہ ہے کہ بھارت جوڑو یاترا آج 26نومبر کو مدھیہ پردیش کے مورتکا گاؤں سے شروع ہوئی تھی۔ جمعہ کومہم شروع ہونے کے بعد پہلی بار، کانگریس لیڈر کے ساتھ پارٹی کی جنرل سکریٹری پرینکا گاندھی واڈرا اور ان کے شوہر رابرٹ واڈرا بھی تھے۔
