بہارشریف (ایم ایم عالم)نالندہ ضلع کے وینا تھانہ علاقے میں 22 مارچ کو ایک دلت لڑکی کے ساتھ مبینہ اجتماعی عصمت دری کے خلاف احتجاج میں جمعرات کے روز بڑے پیمانے پر غم و غصہ پھوٹ پڑا۔منڈل-2 تحریک کے قومی کنوینر امر آزاد کی قیادت میں سینکڑوں مشتعل دیہاتیوں اور سماجی کارکنوں نے وینا پولیس تھانہ کا گھیراؤ کیا اور زبردست احتجاج کیا۔ مظاہرین نے ملزمان کی فوری گرفتاری،جلد از جلد ٹرائل اور سخت ترین سزا اور متاثرہ خاندان کو مناسب معاوضہ اور تحفظ فراہم کرنے کا مطالبہ کیا۔اجتماع سے خطاب کرتے ہوئے امر آزاد نے کہا کہ ریاست میں دلتوں اور پسماندہ افراد کے خلاف جرائم میں اضافہ ہو رہا ہے جس سے امن و امان پر سنگین سوال کھڑے ہو رہے ہیں۔انہوں نے انتباہ دیا کہ اگر فوری کارروائی نہ کی گئی تو احتجاج کا دائرہ ضلع سے باہر ریاست بھر میں پھیل جائے گا۔ محاصرے کے دوران مظاہرین نے پولیس انتظامیہ پر لاپرواہی کا الزام عائد کرتے ہوئے متعلقہ حکام کے خلاف کارروائی کا مطالبہ کیا۔کئی گھنٹے تک جاری رہنے والے مظاہرے کے بعد سب ڈویژنل پولیس افسر جائے وقوعہ پر پہنچے اور مظاہرین سے بات کرتے ہوئے انہیں یقین دلایا کہ ملزمان کی گرفتاری کے لیے مسلسل چھاپے مارے جا رہے ہیں اور جلد ہی سب کو گرفتار کر لیا جائے گا۔اس مظاہرے میں بڑی تعداد میں مقامی باشندوں اور مختلف سماجی تنظیموں کے نمائندوں بشمول امر آزاد پاسوان،سبودھ پاسوان،پریم پاسوان،سونو پاسوان اور دیگر نے شرکت کی۔انہوں نے متفقہ طور پر اعلان کیا کہ جب تک متاثرہ کو انصاف نہیں ملتا ان کی جدوجہد جاری رہے گی۔
