نئی دہلی، (یو این آئی) فاسٹ بولنگ آل راؤنڈر کاشوی گوتم کو اپریل میں جنوبی افریقہ میں ہونے والی پانچ میچوں کی ٹی 20 سیریز کے لیے ہندوستانی ٹیم میں منتخب کیا گیا ہے۔ کاشوی نے حالیہ آسٹریلیا کے دورے کے دوران ٹیسٹ اور ون ڈے دونوں سیریز میں حصہ لیا تھا، لیکن وہ ابھی تک اپنا ٹی20 ڈیبیو نہیں کر پائی ہیں۔ سلیکٹرز نے اوما چھتری کو بھی ٹیم میں ریچا گھوش کے بیک اپ کے طور پر شامل کیا ہے۔ چھتری نے 17 سالہ جی کملینی کی جگہ لی ہے، جنہوں نے دسمبر میں سری لنکا کے خلاف ہوم سیریز میں ٹی 20 ڈیبیو کرنے کے بعد سے کوئی بین الاقوامی میچ نہیں کھیلا ہے۔ وہ آسٹریلیا کے دورے پر ٹی ٹوئنٹی اسکواڈ کا حصہ تھیں، لیکن انہیں کوئی بھی میچ کھیلنے کا موقع نہیں ملا تھا۔ سری لنکا کے خلاف تمام پانچ ٹی ٹوئنٹی کھیلے اور آسٹریلیا کے دورے کے دوران بینچ پر رہنے والی بائیں ہاتھ کی اسپنر ویشنوی شرما کو بھی باہر کردیا گیا ہے۔ آسٹریلیا کے دورے پر دو میچوں میں 3 اور 1 رنز بنائے اور تین اوورز میں 30 رنز دینے والی آل راؤنڈر امنجوت کور کو بھی باہر کا راستہ دکھایا گیا ہے۔ اروندھتی ریڈی، رینوکا سنگھ، اور کرانتی گوڈ کے ساتھ گوتم فاسٹ باؤلنگ کا چوتھا آپشن ہوں گی۔ دیپتی شرما، شری چرنی اور شرینکا پاٹل اسپن ڈپارٹمنٹ کی ذمہ داری سنبھالیں گی۔ جنوبی افریقہ کے دورے کا آغاز ڈربن میں ہوگا جہاں پہلے دو ٹی ٹوئنٹی 17 اور 19 اپریل کو کھیلے جائیں گے، اس کے بعد اگلے دو میچز 22 اور 25 اپریل کو جوہانسبرگ میں ہوں گے اور ٹور کا آخری میچ 27 اپریل کو بینونی میں ہوگا۔ جنوبی افریقہ کے خلاف ٹی ٹوئنٹی سیریز کے لیے ہندوستانی اسکواڈ: ہرمن پریت کور (کپتان)، اسمرتی مندھانا (نائب کپتان)، شفالی ورما، جمیمہ روڈریگس، دیپتی شرما، رچا گھوش (وکٹ کیپر)، اروندھتی ریڈی، رینوکا سنگھ، کرانتی گوڈ، شری چرنی، شرینکا پاٹل، کاشوی گوتم، بھارتی پھولمالی، اوما چھتری (وکٹ کیپر)، انشکا شرما۔
