صدقہ فطر رمضان المبارک کی روحانی تربیت کا اہم اور بابرکت حصہ

دیوبند،سماج نیوز سروس : رمضان المبارک رحمتوں ،برکتوں اور مغفرتوں کا وہ مبارک مہینہ ہے جس میں تمام اہل ایمان عبادت وبندگی کے لمحات نہایت خشوع وخضوع کے ساتھ گزارتے ہیں ۔دن میں روزہ ،رات میں تراویح ،ذکر ودعاء ،تلاوت کلام پاک اور صدقہ وخیرات کے ذریعہ ہر ایک روزہ دار اپنے رب کی رضا حاصل کرنے کے لئے کوشش کرتا ہے ،اسی روحانی تربیت کا ایک اہم اوربابرکت حصہ صدقہ ٔ فطر ہے ،جورمضان المبارک کے اختتام پر ادا کیا جاتا ہے ۔ان خیالات کا اظہار وقف عیدگاہ دیوبند کے متولی مولوی محمد انس صدیقی نے کیا ۔انہوں کہا کہ صدقۂ فطر عبادت بھی ہے اور سماجی ہمدردی کاحسین مظہر بھی ہے کیونکہ صددقہ فطر ایک جانب روزہ دار کی روزہ کی کوتاہیوں کی تلافی کا ذریعہ ہے اور دوسری جانب معاشرہ کے غریب ،بے سہارا اور محتاج افراد کے لئے عید کی خوشیوں میں شریک ہونے کا بھی موقع فراہم کرتا ہے ۔انہوں نے کہا کہ رسول اللہ صلی اللہ علیہ وسلم نے صدقہ ٔ فطر کو لازم قرار دیا اور اس کی مقدار مقرر کرکے ہر ایک مرد ،عورت ،چھوٹے اور بڑے مسلمان کی طرف سے ادا کرنے کا حکم دیا اور فرمایا کہ نماز عید سے قبل صدقۂ فطر ادا کیا جائے ۔مولوی محمد انس نے بتایا کہ صدقۂ فطر ہر صاحب استطاعت مسلمان پر لازم ہے اور اس کی ادائیگی کا بہترین وقت عیدکی نماز سے قبل تاکہ ضرورت مند اور بے سہارا افراد کی ضروریات پوری ہوسکیں ،انہوں نے کہا کہ رسول کریم نے صدقۂ فطر کو اس لئے ضرور ی قرار دیا تاکہ روزہ داروں کی لغویات اور بے ہودگیوں کا ازالہ ہوسکے اور مسکینوں ،یتیموں اور بے سہارا افراد کی ضرورتوں کا انتظام ہوسکے ۔انہوں نے بتایا کہ جس نے صدقہ ٔ فطر نماز عید سے پہلے ادا کیا تو یہ مقبول صدقہ ہے اور جس نے بعد میں ادا کیا تو اس کا شمار صدقات میں ہوگا ۔یہی وجہ ہے کہ مذہب اسلام میں عید کے موقع پر صدقہ ٔ فطر کو خصوصی اہمیت دی ہے تاکہ عید کی خوشیاں صرف صاحب استطاعت افراد تک محدود نہ رہیں بلکہ معاشرہ کا ہرفراد ان خوشیوں میں شریک ہوسکے ۔رسول اللہ صلی اللہ علیہ وسلم کا فرمان ہے کہ عید کے موقع پر غریبوں اور ضرورتمندوں کو اس قدر دو کہ کسی کے سامنے دست سوال دراز نہ کریں انہوں نے کہا کہ اگر ایک گھر میں خوشی اور دوسرے گھر میں فاقہ ہو تو معاشرہ میں حقیقی خوشیاں پیدا نہیں ہوسکتیں ،صدقۂ فطر اسی خلاء کو پر کرنے کا ایک مؤثر ذریعہ ہے ،محمد انس صدیقی نے کہا کہ موجودہ مہنگائی اور معاشی بدحالی کے پیش نظر یہ مناسب ہوگا کہ صدقہ ٔ فطر کی ادئیگی میں وسعت رکھی جائے تاکہ ہر شخص اپنی استطاعت کے مطابق اس میں حصہ لے سکے ۔حقیقت یہ ہے کہ صدقۂ فطر رمضان المبارک کی عبادت کا حسین اختتام اور عید کی خوشیوں کا خوبصورت آغاز ہے ،اس لئے یہ عبادت ہمیں یہ پیغام دیتی ہے کہ اسلام محض عبادات کا مذہب نہیں بلکہ ہمدردی ،غمگساری اور اجتماعی خوشیوں کا پیامبر ہے ۔