کولمبو: دوسرے ون ڈے انٹرنیشنل میں سری لنکا نے بھارت کو 32 رنز سے شکست دیکر تین میچوں پر مشتمل سیریز میں 0-1 کی برتری حاصل کرلی۔
کولمبو میں کھیلے گئے میچ میں سری لنکا نے بھارت کو جیت کیلئے 241 رنز کا ہدف دیا تھا جس کے جواب میں بھارتی ٹیم 42.2 اوورز میں 208 رنز پر آل آؤٹ ہوگئی۔
سری لنکا کی طرف سے جیفری وندرسے نے تباہ کن بولنگ کا مظاہرہ کرتے ہوئے 10 اوورز میں 33 رنز کے عوض 6 وکٹیں حاصل کیں جبکہ چارتھ اسالنکا نے 3 کھلاڑیوں کو پویلین کی راہ دکھائی۔
بھارت کی طرف سے روہت شرما 64، اکسر پٹیل 44، شبمن گل 35، واشنگٹن سندر 15 اور ویرات کوہلی 14 رنز بناسکے، انکے علاوہ کوئی بھارتی بیٹر ڈبل فگرز میں داخل نہیں ہوا۔
قبل ازیں سری لنکا نے ٹاس جیت کر پہلے بیٹنگ کرتے ہوئے 50 اوورز میں 9 وکٹوں کے نقصان پر 240 رنز بنائے تھے۔ اویشکا فرنینڈو 40، کمندو مینڈس 40، دونتھ ویلالج 39، کشال مینڈس 30 رنز کے ساتھ نمایاں رہے۔
بھارت کی طرف سے واشنگٹن سندر نے 3، کلدیپ یادو نے 2، اکسر پٹیل اور محمد سراج نے ایک، ایک وکٹ حاصل کی۔یاد رہے کہ بھارت اور سری لنکا کے درمیان تین میچوں پر مشتمل سیریز کا پہلا میچ برابر ہوگیا تھا، سیریز کا تیسرا اور آخری میچ بدھ کو کولمبو میں ہی کھیلا جائے گا۔
وہیں دوسری طرف بھارت کی وائٹ بال ٹیم کے کپتان روہت شرما نے سری لنکا کے دوسرے ون ڈے میچ میں منفرد ریکارڈ بنادیا۔گزشتہ روز سری لنکا نے بھارت کو دوسرے ون ڈے میں شکست سے دوچار کرتے ہوئے تین میچوں کی سیریز میں 0-1 کی برتری حاصل کرلی، بھارتی بیٹنگ لائن دوسرے ون ڈے میں بھی ہدف کا تعاقب کرتے ہوئے ڈھیر ہوگئی تھی۔
240 رنز کے ہدف کے تعاقب میں پوری مہمان ٹیم 208 رنز پر آل آؤٹ ہوئی تھی ، کپتان روہت شرما 64 اور اکشر پٹیل 44 کے علاوہ کوئی بیٹر قابل ذکر کارکردگی نہ دکھا سکا تھا۔
تاہم بھارتی ٹیم کے کپتان روہت شرما ون ڈے انٹرنیشنل میچز میں بطور اوپنر 300 چھکے لگانے والے بیٹر بن گئے ہیں۔
روہت شرما نے دوسرے ون ڈے میں اپنی 64 رنز کی اننگ میں چار چھکے اور پانچ چوکے لگائے تھے۔
روہت شرما نے 177 میچوں میں 302 چھکے لگائے ہیں جبکہ 280 میچوں میں ویسٹ انڈین لیجنڈ کرس گیل 328 چھکوں کے ساتھ فہرست میں پہلے نمبر پر ہیں۔سری لنکا کے سابق اوپنر سنتھ جے سوریا 263 چھکوں کے ساتھ تیسرے نمبر پر موجود ہیں۔
