کانپور، سماج نیوز سروس: نئے تعلیمی سال کے پیشِ نظر ملک بھر کے مدارسِ اسلامیہ اور جامعات میں داخلے کے لیے طلبہ کے سفر کا آغاز ہو چکا ہے۔ اس موقع پر جمعیۃ علماء اترپردیش کے ناظم اعلیٰ حضرت مولانا امین الحق عبداللہ قاسمی نے اخباری بیان کے ذریعہ سفر کرنے والے عزیز طلبہ سے دورانِ سفر انتہائی محتاط رہنے، حکمت و بصیرت سے کام لینے اور دعاؤں کا خصوصی اہتمام کرنے کی تلقین کی ہے۔ مولانا امین الحق عبداللہ قاسمی نے طلبہ کو بنیادی اور ضروری نصیحتیں کرتے ہوئے فرمایا کہ تحصیلِ علم کے لیے سفر کرنا ایک عظیم عبادت اور باعثِ اجر عمل ہے۔ لہٰذا طلبہ اپنے اس سفر کو ذکر و اذکار اور مسنون دعاؤں سے بابرکت بنائیں۔ دورانِ سفر اپنا کنفرم ٹکٹ، اصل شناختی کارڈ اور دیگر ضروری دستاویزات ہمیشہ ہمراہ رکھیں، اپنے سامان کی حفاظت کریں اور اپنے رویے سے اسلامی اخلاق و کردار اور سنجیدگی کا بہترین نمونہ پیش کریں۔ موجودہ حالات کے تناظر میں ناظم اعلیٰ جمعیۃ علماء یوپی نے خصوصی ہدایت دیتے ہوئے کہا کہ طلبہ ٹرینوں اور بسوں میں کسی بھی قسم کے انتشار، ہنگامہ آرائی اور شرپسندی سے خود کو مکمل طور پر دور رکھیں۔ اگر کوئی شرپسند عنصر زبردستی الجھنے، تنگ کرنے یا اشتعال دلانے کی کوشش کرے تو ہرگز اس کی شرپسندی کا جواب جذباتیت میں نہ دیں، بلکہ انتہائی صبر و تحمل کا مظاہرہ کریں۔ مولانا قاسمی نے زور دے کر کہا کہ کسی بھی زیادتی یا ہراساں کیے جانے کی صورت میں فوری طور پر قانونی راستہ اختیار کریں۔ اگر کوئی ناخوشگوار واقعہ ٹرین میں پیش آئے تو فوراً قریبی اسٹیشن کی جی آر پی (GRP) کو مطلع کریں اور متعلقہ محکمے کی سرکاری ہیلپ لائن نمبرات کا استعمال کرتے ہوئے اپنی شکایت درج کرائیں۔ مزید برآں، انہوں نے طلبہ اور ان کے اساتذہ و سرپرستوں کو یہ تنظیمی مشورہ دیا کہ ان کا سفر جن اضلاع اور صوبوں سے گزرے، روانگی سے قبل وہاں کے مقامی جمعیۃ علماء کے فعال ذمہ داران کے رابطہ نمبرات ضرور حاصل کر کے اپنے پاس محفوظ کر لیں۔ کسی بھی ہنگامی یا مشکل صورتحال میں فوراً ان مقامی ذمہ داران سے رابطہ قائم کریں تاکہ بروقت ضروری کارروائی اور قانونی مدد کو یقینی بنایا جا سکے۔آخر میں مولانا نے تمام طلبہ کے پرامن و محفوظ سفر، حصولِ علم میں کامیابی اور درجات کی بلندی کے لیے اللہ رب العزت کی بارگاہ میں خصوصی دعا فرمائی۔
