بیدر،پریس ریلیز،ہمارا سماج: 43ویں سالانہ کانووکیشن کی پُروقار تقریب گلبرگہ کے احاطہ ڈاکٹر بی آر امبیڈکر بھون، گیان گنگا کامپلیکس، سیڑ م روڈ گلبرگہ میں منعقد ہوئی، جس میں ریاستِ کرناٹک کے گورنر مسٹرتھاور چند گہلوت نے شرکت فرمائی۔ اس روح پرور موقع پرسکسیس ایجوکیشن ٹرسٹ کے زیرِ اہتمام قائم سکسیس ڈگری کالج بسواکلیان کی ہونہار طالبہ عالیہ انجم دختر عبدالرشید نے شاندار تعلیمی کامیابی کے ذریعے ادارہ اور علاقہ دونوں کا نام روشن کیا۔ انہوں نے سی بی زیڈ (CBZ) میں اعلیٰ ترین نشانات حاصل کرتے ہوئے آنجہانی سری وشواناتھ نٹور میموریل گولڈ میڈل کے لیے نامزدگی کا اعزاز حاصل کیا۔ یہ باوقار اعزاز گلبرگہ یونیورسٹی کی جانب سے تفویض کیا گیا۔ تقریب میں یونیورسٹی کے وائس چانسلر، رجسٹرار (اکیڈمک و ایویلیوایشن)، مختلف شعبہ جات کے صدور اور پروفیسران کی معزز موجودگی نے وقار و عظمت میں اضافہ کیا۔طالبہ عالیہ انجم دختر عبدالرشید کو کرناٹک کے گورنر مسٹر تھاور چند گہلوت کے ہاتھوں اعزاز دیا گیا۔سکسیس ایجوکیشن ٹرسٹ اور سکسیس ڈگری کالج بسواکلیان کے انتظامیہ، پرنسپل، اساتذہ کرام اور معزز ٹرسٹیوں نے عالیہ انجم کو دل کی گہرائیوں سے مبارکباد پیش کی اور اسے محنت، استقامت اور علمی یکسوئی کا درخشاں ثمر قرار دیا۔ اور کہا کہ یہ کامیابی طالبہ کی شب و روز کاوشوں کے ساتھ ساتھ ادارے کے معیاری تعلیمی نظام اور اساتذہ کی مخلصانہ رہنمائی کا مظہر ہے۔انتظامیہ نے اپنے پیغام میں اس عزم کا اعادہ کیا کہ ادارہ مستقبل میں بھی طلبہ و طالبات کو زیورِ تعلیم سے آراستہ کرنے، اخلاقی اقدار کو فروغ دینے اور مسابقتی میدان میں نمایاں مقام دلانے کے لیے بھرپور جدوجہد جاری رکھے گا۔سکسیس ایجوکیشن ٹرسٹ اور سکسیس ڈگری کالج بسواکلیان کی جانب سے عالیہ انجم اور ان کے اہلِ خانہ کو پُرجوش مبارکباد پیش کرتے ہوئے نیک تمناؤں کا اظہار کیا گیا کہ وہ آئندہ بھی اسی عزم و حوصلے کے ساتھ علمی منازل طے کرتی رہیں اور قوم و ملت کے لیے باعثِ افتخار بنتی رہیں۔ یہ کامیابی بسواکلیان کے تعلیمی حلقوں میں مسرت و افتخار کی لہر دوڑا گئی ہے۔
