بغداد(ہ س)۔مشرق وسطیٰ میں امریکی فوجی کمان نے اعلان کیا ہے کہ عراقی صوبے الانبار میں وادی الغدف کے مشرق میں واقع علاقے الحزیمی میں داعش تنظیم کے 15 دہشت گردوں کو ہلاک کر دیا گیا۔آج ہفتے کے روز جاری بیان میں بتایا گیا ہے کہ "داعش کے اس گروہ کے پاس کئی ہتھیار، بم اور دھماکا خیز بیلٹیں موجود تھیں … کارروائی کے دوران میں کسی شہری کے زخمی ہونے کی اطلاع نہیں ملی”۔بیان کے مطابق عراقی اسپیشل فورسز کے ساتھ مشترکہ چھاپوں میں امریکی فوج کے سات اہل کار زخمی ہو گئے۔اس سے قبل عراقی فوج نے جمعے کے روز بتایا تھا کہ درست انٹیلی جنس معلومات سے تصدیق ہوئی ہے کہ ہلاک ہونے والوں میں داعش کی صف اول کی قیادت کے افراد بھی شامل ہیں۔عراقی فوج کے مطابق علاقے میں داعش کے تمام خفیہ ٹھکانوں کو ہتھیاروں اور دھماکا خیز بیلٹوں سمیت تباہ کر دیا گیا۔ علاوہ ازیں بعض اہم دستاویزات اور رابطوں کے آلات قبضے میں لے لیے گئے۔یاد رہے کہ 2017 سے عراق اور شام میں داعش تنظیم کی قوت کمزور پڑ گئی ہے تاہم اس کی بعض باقیات ابھی تک الانبار کے علاقوں میں سرگرم ہیں۔ عراقی فوج ان کا تعاقب کر رہی ہے۔امریکی فوج کے مطابق 2024 کے ابتدائی چھ ماہ میں داعش تنظیم نے عراق اور شام میں 153 حملے کیے جب کہ 2023 کے دوران ان حملوں کی تعداد 121 تھی۔عراقی اراضی پر اتحادی افواج میں 2500 امریکی فوجی شامل ہیں۔ یہ اہل کار مقامی فورسز کو مشاورت اور معاونت پیش کرتے ہیں تا کہ داعش تنظیم کی واپسی کو روکا جا سکے۔ داعش نے 2014 میں عراق اور شام میں بڑی اراضی پر قبضہ کر لیا تھا۔ بعد ازاں اسے دونوں جگہ شکست کا سامنا کرنا پڑا۔
