پیرس (یو این آئی) ہندوستانی بیڈمنٹن کھلاڑی سوکانت کدم نے ہفتہ کو پیرس پیرا اولمپک 2024 گیمز کے بیڈمنٹن ایونٹ کے سیمی فائنل میں اور خاتون کھلاڑی مندیپ کور نے کوارٹر فائنل میں جگہ بنالی۔سوکانت کدم نے آج مینز سنگلز ایس ایچ4 گروپ مرحلے میں تھائی لینڈ کے سری پونگ تیماروپ کو سیدھے گیم میں 2-0 سے شکست دے کر سیمی فائنل میں اپنی جگہ بنا لی۔ انہوں نے تھائی لینڈ کے شٹلر کو 21-12، 21-12 سے شکست دی۔خواتین بیڈمنٹن کھلاڑی مندیپ کور خواتین کے سنگلز ایس ایل 3 گروپ مرحلے میں شاندار جیت کے ساتھ کوارٹر فائنل میں داخل ہوگئیں۔ مندیپ نے مقابلے میں آسٹریلیا کی ونوت سیلن اوریلی کے خلاف پہلا گیم 21-23 سے ہارنے کے بعد لگاتار دو گیمز 21-10 اور 21-17 سے جیتے اور میچ 2-1 سے جیت کر کوارٹر فائنل میں داخلہ لیا۔اسی طرح مردوں کے سنگلز ایس ایل 3 گروپ مرحلے میں ہندوستانی کھلاڑی نتیش کمار نے پیرس پیرالمپکس میں اپنی شاندار کارکردگی کو جاری رکھتے ہوئے اگلے راؤنڈ میں جگہ بنالی۔ انہوں نے تھائی لینڈ کے بنسن مونگکھون کو سیدھے گیمز میں 2-0 سے ہرایا۔نتیش کمار نے آج کھیلے گئے میچ میں مونگکھون کو 21-13، 21-14 سے شکست دی۔مینز سنگلز ایس ایل 3 گروپ مرحلے کے ایک اور میچ میں منوج سرکار ناک آؤٹ مرحلے کے لیے کوالیفائی نہیں کر سکے۔ چین کے جیان یوان یانگ کے خلاف 2-0 سے جیت کے باوجود منوج ناک آؤٹ مرحلے کے لیے کوالیفائی نہیں کر سکے۔ انہوں نے اپنے گروپ میں تیسری پوزیشن حاصل کی۔ گروپ کے ٹاپ دو کھلاڑیوں نے اگلے راؤنڈ کے لیے کوالیفائی کر لیا۔ اسی طرح ہندوستانی کھلاڑی ترون ڈھلون کو آج کھیلے گئے مینز سنگلز کے ایس ایل 4 گروپ مرحلے کے میچ میں شکست کا منہ دیکھنا پڑا۔ ترون کو فرانس کے لوکاس مازور نے 2-0 سے شکست دی۔ اس شکست کے ساتھ ہی ترون کی پیرا اولمپک مہم ختم ہوگئی۔
