پٹنہ، (یو این آئی): سُنیِت چورسیا نے چوٹ کے باعث طویل عرصے تک کھیل سے دور رہنے کے بعد شاندار واپسی کا اعلان کیا اور ‘2026 ڈی پی ورلڈ پی جی ٹی آئی نیکسٹ جین سیزن کے چوتھے ایونٹ، الفا اسپورٹس اکیڈمی گولف چیمپئن شپ میں سخت محنت کے بعد ایک شاٹ سے فتح حاصل کر لی۔ 25 لاکھ روپے کی انعامی رقم والی اس چیمپئن شپ کا انعقاد پٹنہ گولف کلب نے کیا تھا۔کولکتہ کے سُنیِت چورسیا (71-65-73)، جو کہ عظیم گولفر ایس ایس پی چورسیا کے بھتیجے ہیں، تیسرے اور آخری راؤنڈ میں 73 کا اسکور بنا کر اپنا پہلا خطاب جیتنے میں کامیاب رہے۔ انہوں نے اس ہفتے مجموعی طور پر سات انڈر 209 کا اسکور کیا۔ اکتیس سالہ سُنیِت کو اس جیت سے 3,17,875 روپے کی انعامی رقم ملی، جس کی بدولت وہ ‘2026 ڈی پی ورلڈ پی جی ٹی آئی نیکسٹ جین آرڈر آف میرٹ میں 41 ویں نمبر سے چھٹے نمبر پر آگئے ہیں۔بپن مکھیا (68-75-67) نے گزشتہ روز کا بہترین اسکور 67 بنایا، جس سے انہیں چار درجے کا فائدہ ہوا اور وہ سکس انڈر 210 کے ساتھ رنر اپ رہے۔ بپن کے دوسرے نمبر پر رہنے سے انہیں 2,67,875 روپے کا چیک ملا، جس سے وہ نیکسٹ جین میرٹ لسٹ میں ساتویں سے پہلے نمبر پر آگئے ہیں، کیونکہ اس سیزن میں ان کی مجموعی کمائی 5,28,688 روپے ہوگئی ہے۔ دویش رانا (68)، ونے کمار یادو (72) اور راجیش کمار گوتم (74) نے تھری انڈر 213 کے ساتھ مشترکہ طور پر تیسری پوزیشن حاصل کی۔ پٹنہ کے پیشہ ور کھلاڑیوں میں ایم ڈی نواب نے ون اوور 217 کے ساتھ 13 ویں پوزیشن حاصل کر کے بہترین کارکردگی کا مظاہرہ کیا۔
