نئی دہلی،پریس ریلیز،ہمارا سماج:ایران کے صدر آیت اللہ رئیسی اور وزیر خارجہ حسین امیر عبداللہیان سمیت 9 لوگوں کی شہادت پر تعزیت پیش کرنے کا سلسلہ جاری ہے ۔ اسی کے تحت دہلی کے سنئیر کانگریسی لیڈر اور حلقہ مصطفیٰ آباد سے سابق ممبر اسمبلی حسن احمد ( چیف پیٹرن القلم فاؤنڈیشن) نے القلم فاؤنڈیشن کے خازن ولی مہدی کے ہمراہ ہندوستان کی راجدھانی نئی دہلی واقع ایرانی سفارت خانے میں سفیر ایران ڈاکٹر ایرج الہی سے ملاقات کی ۔ اس موقع پر مذکورہ دونوں شخصیات نے ایرج الہی کو تعزیت پیش کرتے ہوئے ولی فقیہ آیت اللہ خامنہ ای کی خدمت میں ایک تعزیت نامہ بھی پیش کیا جس کو سفیر ایران نے قبول کیا ۔اس موقع پر بات کرتے ہوئے حسن احمد نے کہا کہ جو دلسوز حادثہ ایران میں پیش آیا ہے اس سے ساری دنیا حیرت میں ہے ۔ اس میں کوئی شک نہیں ہے کہ ہر نفس کو موت کا مزہ چکھنا ہے لیکن چند شخصیات ایسی بھی ہوتی ہیں کہ جن کے چلے جانے سے دل پر قابو نہیں رہ پاتا ۔ حسن احمد نے کہا کہ آیت اللہ رئیسی نے ایران کو اقتصادی بحران سے تو نکالا ہی ساتھ ہی فلسطینی عوام کی جو حوصلہ افزائی کی ہے اس سے یہ طے ہو گیا ہے کی جب بھی دنیا حامیان مظلومین کا ذکر کرے گی وہ آیت اللہ رئیسی کا ذکر کئے بنا نہیں رہے گی ۔ان کی خدمات لوگوں کے دلوں میں انہیں ہمیشہ زندہ رکھیں گی ۔حسن احمد نے کہا کہ آیت اللہ رئیسی ایک سیاسی لیڈر ہونے کے ساتھ ساتھ مجتہد ،فقیہ شخصیت بھی تھے اور اسی لئے ساری دنیا میں ان کے چاہنے والے موجود ہیں ۔ہم ایرانی قوم کے اوپر ٹوٹے غموں کے اس پہاڑ میں برابر کے شریک ہیں اور اللہ سے دعا کرتے ہیں کہ شہدائے خدمت کو جوار معصومین میں بلند مقام عطا فرمائے آمین ۔ القلم فاؤنڈیشن کے خازن ولی مہدی نے کہا کہ جس وقت یہ دل سوز خبر ہمیں ملی دل غم میں ڈوب گیا ۔ فلسطین کے تعلق سے جو خدمات ایران کی ہیں ان کو ساری دنیا جانتی ہے ۔انہوں نے کہا کہ ایران نے اپنے اوپر لگنے والی عالمی پابندیوں کے بعد بھی جس طرح خود کو دنیا کے سامنے تیار کیا ہے اور جو ترقی آج ایران میں آئی ہے اس میں آیت اللہ رئیسی جیسے ۔حب وطن کا بہت بڑا رول ہے۔ولی مہدی نے کہا کہ ساری فکر ،منکسر المزاج ،سفر میں بھی واجبات ترک نہ کرنے والی آیت اللہ رئیسی کو ہندوستان کا ہر انسانیت کا حامی یاد رکھے گا اور ہم یہاں سفیر ایران کے ذریعہ قوم ایران اور خصوصاً رہبر معظم آیت اللہ خامنہ ای کی خدمت میں تعزیت پیش کرتے ہیں۔
