ایڈن گارڈن، (یواین آئی )ٹی ٹونٹی ورلڈ کپ کے افتتاحی میچ میں اٹلی کرکٹ ٹیم کو اس وقت شدید نقصان اٹھانا پڑا جب ٹیم کے کپتان وین میڈسن کندھے کی چوٹ کے باعث میچ سے باہر ہو گئے۔ اسکاٹ لینڈ کے خلاف اہم مقابلے کے دوران پیش آنے والے اس واقعے نے اٹلی کی قیادت اور ٹیم کمبی نیشن پر سوالیہ نشان لگا دیا ہے۔اسپورٹس ویب سائٹ کے مطابق یہ واقعہ اننگز کے چوتھے اوور میں پیش آیا جب وین میڈسن نے مڈ وکٹ پر ایک شاندار ڈائیونگ سٹاپ کی کوشش کی، تاہم توازن برقرار نہ رکھ سکے اور بائیں جانب زمین پر گر گئے۔ گرنے کے فوراً بعد وہ شدید تکلیف میں مبتلا دکھائی دیے اور اپنا بایاں بازو پکڑتے ہوئے میدان سے باہر چلے گئے۔42 سالہ وین میڈسن کو فوری طور پر ابتدائی طبی امداد فراہم کی گئی، تاہم وہ میچ میں مزید حصہ نہ لے سکے۔ انہیں کندھے کی چوٹ کے ساتھ ساتھ ممکنہ کنکشن اور گردن کی چوٹ کے خدشے کے پیش نظر میڈیکل چیک اپ کے لیے اسپتال منتقل کر دیا گیا ہے۔ٹیم انتظامیہ کے مطابق میڈیکل رپورٹس آنے کے بعد ہی یہ فیصلہ کیا جائے گا کہ وین میڈسن ورلڈ کپ کے آئندہ میچوں کے لیے دستیاب ہوں گے یا نہیں۔
