نئی دہلی (یو این آئی) مرکزی وزیر کھیل منسکھ مانڈویہ نے جمعرات کو قومی کھیل کے دن کے موقع پر کہا کہ فٹ اور صحت مند رہنے کے لیے ہر ایک کو اپنی دلچسپی کے مطابق ایک گھنٹہ کھیلنا چاہیے۔مسٹر مانڈویہ نے آج یہاں میجر دھیان چند نیشنل اسٹیڈیم میں منعقد ایک تقریب میں یہ بات کہی۔ اس دوران انہوں نے میجر دھیان چند کے مجسمے پر پھول چڑھائے۔اس موقع پر، مرکزی وزیر کھیل نے فٹنس اور صحت کی اہمیت پر زور دیا اور کہا، "ملک کے شہری کو فٹ اور صحت مند رہنا چاہیے۔ صحت مند شہری ہی صحت مند قوم بناتا ہے۔ 2047 میں ترقی یافتہ ہندوستان کی تعمیر کے لیے ہر شہری کے لیے صحت مند اور تندرست رہنا ضروری ہے۔انہوں نے کہا کہ فٹ رہنے کے لیے کھیلوں میں حصہ لینا ضروری ہے۔ اس لیے تمام شہری اپنی دلچسپی کے مطابق ایک گھنٹہ کھیلیں۔ میں آج ایک گھنٹہ فٹ بال کھیلوں گا۔ قابل ذکر ہے کہ ہاکی کے عظیم کھلاڑی میجر دھیان چند کے یوم پیدائش 29 اگست کو قومی کھیلوں کے دن کے طور پر منایا جاتا ہے۔ دھیان چند کی پیدائش 29 اگست 1905 کو پریاگ راج میں ہوئی تھی۔ انہیں ہاکی کا جادوگر بھی کہا جاتا ہے۔
