ٹیم انڈیا کو امیتابھ بچن کا پرجوش پیغام یُدھ تو ہر دن ہوتا ہے پر مہا یُدھ سب سے کڑی پرکشا لیتا ہے

نئی دہلی ( آئی این ایس انڈیا) امریکہ اور ویسٹ انڈیز میں 2 جون سے شروع ہونے والا ٹی ٹوئنٹی ورلڈ کپ میں بہت کم ہی وقت رہ گیا ہے۔ دو تین ٹیموں کو چھوڑ کر تقریباً تمام ٹیموں نے ٹی ٹوئنٹی ورلڈ کپ کے لیے اپنے اسکواڈ کا اعلان بھی کر دیا ہے۔اس بڑے آئی سی سی ٹورنامنٹ کے پیش نظر ٹی وی چینل اسٹار اسپورٹ نے بھارتی ٹیم کے لیے ایک 40 سیکنڈ کا ویڈیو جاری کیا ہے۔ جس میں بالی ووڈ کے لیجنڈ امیتابھ بچن، اپنی آنے والی فلم کالکی 2898 AD کے مرکزی کردار ‘اشوتھاما’ میں نظر آرہے ہیں اور وہ اپنی بارعب آواز میں ٹورنامنٹ سے قبل بھارتی کرکٹ ٹیم کے لیے پرجوش پیغام دے رہے ہیں۔40 سیکنڈ کی ویڈیو امیتابھ کے اعلان کے ساتھ شروع ہوتی ہے ” یُدھ تو ہر دن ہوتا ہے پر مہا یُدھ سب سے کڑی پرکشا لیتا ہے، یہاں پل پل پارہ چڑھتا ہے، رگ رگ میں خون کھولتا ہے، ہار جس کے گلے میں لگے وہ بہادر بھی سر اٹھا کر چلتا ہے۔ اس ڈائیلاگ کو کالکی 2898 AD کے تھیم میوزک کے پس منظر میں ترتیب دیا گیا ہے۔ویڈیو میں میدان میں نیلے رنگ میں ایکشن میں کچھ کھلاڑیوں کی جھلکیاں بھی دکھائی گئی ہیں، جن میں ویراٹ کوہلی، روہت شرما، ہاردک پانڈیا، سوریہ کمار یادو، اور جسپریت بمراہ شامل ہیں۔قابل ذکر ہے کہ ہندو افسانوں سے متاثر کالکی 2898 AD فلم میں پربھاس اور دیپیکا پڈوکون اہم کرداروں میں ہیں۔ یہ فلم 27 جون کو سینما گھروں میں دستک دے گی۔ٹی ٹوئنٹی ورلڈ کپ میں بھارتی ٹیم کا پہلا میچ 5 جون کو آئرلینڈ سے ہوگا اور 9 جون کو بھارت اور پاکستان آمنے سامنے ہوں گے۔ اس کے بعد بھارتی ٹیم 12 جون کو میزبان امریکہ کے خلاف کھیلے گی اور 15 جون کو فلوریڈا میں کینیڈا کے خلاف اپنا میچ کھیلے گی۔