نئی دہلی، جامعہ ملیہ اسلامیہ کے تحت چلنے والی ڈاکٹر ذاکر حسین میموریل سوسائٹی کی سالانہ میٹنگ شیخ الجامعہ پروفیسر نجمہ اختر کی صدارت میں منعقد ہوئی۔ڈاکٹرذاکر حسین میموریل سوسائٹی کی جنرل سکریٹری پروفیسر نجمہ اختر نے سوسائٹی کے سبھی عہدیداران، ممبران اورخصوصی مہمانوں کا سالانہ میٹنگ میں خیرمقدم کرتے ہوئے سوسائٹی کے قیام اور اس کے مقاصد سے روشناس کرایا۔واضح رہے کہ سابق صدر جمہوریہ اور جامعہ ملیہ اسلامیہ کے سابق شیخ الجامعہ مرحوم ڈاکٹرذاکرحسین صاحب کے نام سے رجسٹرڈ سوسائٹی کا نظم ونسق جامعہ ملیہ اسلامیہ کے پاس ہے۔جامعہ کی شیخ الجامعہ اس کی صدر ہیں۔یہ سوسائٹی تعلیم نسواں اور خواتین کو بااختیاربنانے پر کام کرتی ہے۔اس کے تحت کئی تعلیمی اور کرافٹ پروگرام چل رہے ہیں۔جامعہ ملیہ اسلامیہ کے کیمپس میں ہی اس کا کنڈینسڈ کورس چلتاہے جس میں پانچ سو سے زیادہ طالبات زیر تعلیم ہیں۔جامعہ ملیہ اسلامیہ کے اسکول بورڈ سے دسویں اور بارھویں کا امتحان دلاکر اعلیٰ تعلیم کیلئے لڑکیوں کیلئے راستہ ہموارکیا جاتاہے۔اس کے تحت آموزشی معذوریت (learning disability) کے خصوصی زمرے کے بچوں کیلئے ایک چائلڈ گائیڈینس سینٹر بھی قائم کیا گیا ہے جس میں اسپیشل ایجوکیشن کے کئی اساتذہ معذوربچوں کوتعلیم و تربیت دے کر انھیں عام زندگی گزارنے کے لائق بناتے ہیں۔اس کے تحت خواتین کو بااختیاربنانے کیلئے ایک کرافٹ سینٹر بھی قائم ہے جس میں خواتین کو سلائی، کڑھائی ، بنائی، پیپر ورک اور ٹائی-ڈائی جیسے کرافٹ سکھائے جاتے ہیں۔سوسائٹی کی جنرل سکریٹری پروفیسر سارہ بیگم نے اس کے سبھی اداروں کو فعال بنانے میں اہم رول اداکیا ہے۔میٹنگ کی صدارت کرتے ہوئے جامعہ ملیہ اسلامیہ کی شیخ الجامعہ پروفیسر نجمہ اختر نے پروفیسرسارہ بیگم کی کوششوں کو سراہا اور ان کے کام کی ستائش کی۔سوسائٹی کے دائرۂ کارکو وسیع کرنے اور ا س کیلئے فنڈکی فراہمی کیلئے میٹنگ میں کئی تجاویز پیش کی گئیں۔پروگرام میں جامعہ کے رجسٹرار پروفیسر ناظم حسین الجعفری، مولاناآزادنیشنل اردویونیورسٹی کے سابق وائس چانسلر پروفیسر محمد میاں،دہلی ٹیکنکل یونیورسٹی کے پرووائس چانسلر پروفیسرریحان خان سوری، پروفیسر خواجہ محمد شاہد، کئی این جی اوز کے مندوبین،سوسائٹی کے سبھی اداروں کے ذمے داران، جامعہ گیمس اینڈ اسپورٹس کے ڈائرکٹر پروفیسر وسیم احمد خاں، ڈاکٹرمحمد فیض اللہ خاں، ڈاکٹر محمد اسجد انصاری کے علاوہ بڑی تعدادمیں مہمان موجودتھے۔کنڈینسڈ کورس کے پرنسپل جناب محمد اقبال کے اظہارتشکر پرمیٹنگ اختتام پذیر ہوئی۔
