سید پرویز قیصر
نیدر لینڈس نے پنالٹی شوٹ آوٹ میں عالمی چمپیئن جرمنی کو شکست دیکر رتیسری مرتبہ اولمپک کھیلوں میں طلائی تمغہ جیتا۔ کولمبس اسٹیدیم میں ہوئے فائنل میچ میں دونوں ٹیمیں مقررہ وقت تک1–1 گول سے برابر تھیں۔ دونوں گول چوتھے کوارٹر میں ہوئے۔ 46 ویں منٹ میں تھیری برنکمین نے فیلڈٖ گول کرکے اپنی نیدرلینڈس کو برتری دلادی تھی۔ تھیس پرنز نے جرمنی کیلئے 50 ویں منٹ میں پنالٹی کارنر پر گول کرکے اسکور برابر کرایا تھا۔ پنالٹی شوٹ آوٹ میں نیدر لینڈس کے پانچ میں سے تین کھلاڑیوں گول کئے جبکہ جرمنی کی جانب سے ایک ہی گول کیا جاسکا۔
ہندوستان میں 2023 میں ہوئے ہاکی کے عالمی کپ میں جرمنی نے خطاب جیتا تھا جبکہ نیدر لینڈس کو تیسرا مقام ملا تھا۔ ٹوکیو میں ہوئے اولمپک کھیلوں میں جرمنی کو چوتھا مقام ملا تھا جبکہ نیدر لینڈ چھٹے مقام پر رہی تھی۔
کانسہ کے تمغہ کیلئے ہوئے میچ میں ہندوستان نے اسپین کو2–1 سے شکست دی۔ ٹوکیو میں بھی ہندوستان کو تیسرا مقام ملا تھا جبکہ اسپین آٹھویں مقام پر رہا تھا۔ ایک سال پہلے ہندوستان میں ہوئے ہاکی کے عالمی کپ میں ہندوستان نے نواں مقام حاصل کیا تھا جبکہ اسپین چھٹے مقام پر رہا تھا۔
پیرس میں بارہ ٹیموں کو کھیلنے کا اعزاز حاصل ہوا تھا جن کو دو گروپوں میں تقسیم کیا گیا تھا۔ گروپ اے جرمن، نیدر لینٖڈس، برٖطانیہ، اسپین ، جنوبی افریقہ اور فرانس پر مشتمل تھا جبکہ گروپ بی میں بلجیم، ہندوستان، آسڑیلیا، ارجن ٹائنا، آئیرلینڈ اور نیوزی لینڈ کو رکھا گیا تھا۔ ہر گروپ سے پہلے چار مقام حاصل کرنے والی ٹیمیں کوارٹر فائنل میں کھیلنے کی حقدار بنی تھی۔
ہندوستان نے برطانیہ کو پنالٹی شوٹ آوٹ میں4–2 سے شکست دیکر سیمی فائنل میں داخلہ حاصل کیا تھا۔ مقررہ وقت تک دونوں ٹیمیں1–1 گول سے برابر تھیں۔ اسپین نے بلجیم کو3–2 سے شکست دیکر آخری چار ٹیموں میں جگہ بنائی تھی۔ نیدر لینڈس نے آسڑیلیا کو 2–0 سے اور جرمنی نے ارجن ٹائنا کو3–2 سے شکست دیکر سیمی فائنل میں داخلہ حاصل کیا تھا۔پہلے سے سیمی فائنل میں نیدر لینڈس نے اسپین کو4–0 سے شکست دی تھی جبکہ جرمنی نے ہندوستان کو دوسرے سیمی فائنل میں3–2 سے شکست دی تھی۔
ہاکی ٹورنامنٹ میں جو 38 میچ کھیلے گئے ان میں4.05 گول فی میچ کی اوسط کے ساتھ154 گول ہوئے۔ اس میں سے 77 گول فیلڈ گول تھے جبکہ62 گول پنالٹی کارنرس پر کئے گئے تھے۔ پنالٹی اسڑوکس پر پندرہ گول مارے گئے تھے۔72 کھلاڑیوں نے یہ گول کئے جس میں ہندوستان کے دفاعی کھلاڑی ہرمنپریت سنگھ نے آٹھ میچوں میں دس گولوں کے ساتھ پہلے مقام پر رہے۔ انہوں نے سات گول پنالٹی کارنرس پر اور تین گول پنالٹی سٹروکس پر کئے۔ آسڑیلیا کے فارورڈ بلیگ گورس چھ میچوں میں سات گول کرکے دوسرے مقام پر رہے۔ انہوں نے دو فیلڈ گولوں کے علاوہ تین گول پنالٹی کارنرس پر اور دو گول پنالٹی اسٹروکس پت کئے۔ پانچ گول کے ساتھ بلجیم کے الگذینڈر ہنڈریکس، جرمنی کے کرسٹوفر روحر اور نیدر لینڈس کے جپ جینسن پانچ ۔پانچ گولوں کے ساتھ مشترکہ طور پر تیسرے مقام پر رہے۔ سات کھلاڑیوں نے چار۔چار گول کئے جبکہ نو کھلاڑی تین۔تین گول کرنے میں کامیاب رہے۔ سولہ کھلاڑی دو۔دو گول کرنے میں کامیاب رہے جبکہ35 کھلاڑیوں نے ایک۔ایک گول داغا۔ آسڑیلیا کے فارورڈ بلیگ گورس پیرس میں ہیٹ ٹرک کرنے والے واحد کھلاڑی رہے۔انہوں نے نیوزی لینڈ کے خلاف اپنی ٹیم کی5-0 کی جیت میں تین گول مارے تھے۔
نیدر لینڈس اور جرمنی نے سب سے زیادہ گول کئے جبکہ فرانس کے خلاف سب سے زیادہ گول ہوئے۔ نیدرلینڈس اور جرمنی نے آٹھ ۔ آٹھ میچوں میں 23۔23 گول کئے ۔ فرانس کے خلاف پانچ میچوں میں 22 گول ہوئے۔ فیصل فیچرس
